Վերջերս ԱԺ-ն ընդունեց «Բարձրագույն կրթության եւ գիտության մասին» օրենքում փոփխություններ և լրացումներ անելու մասին օրենք, որը հանրապետության նախագահը չստորագրեց և 2021 թ.-ի ապրիլի 22-ին դիմեց ՀՀ Սահմանադրական դատարան՝ վիճարկելով օրենքի սահմանադրականության հարցը՝ բուհի կառավարման խորհրդի «56% (հիմնադրի և լիազոր մարմնի կողմից նշանակված անդամներ) + 44% (համալսարանի դասախոսներ և ուսանողներ)» բանաձևի պարագայում։

Դրա փոխարեն երեկ իշխանությունը կայացրեց մի նոր որոշում, ըստ որի նախատեսվում է փոփոխության ենթարկել հիմնադրամ բուհերի հոգաբարձուների խորհրդի ձեւավորման կարգը՝ թվակազմը 32-ից կամ 24-ից դարձնելով 20: Առաջարկվող նոր կարգով բուհի հոգաբարձուների խորհրդի 20 հոգանոց կազմում կառավարության կողմից կապահովվի 11 անդամ (55%), ԿԳՄՍ նախարարության կողմից՝ 2 անդամ (10%), հաստատության պրոֆեսորադասախոսական կազմից՝ 2 անդամ (10%), ուսանողական համակազմից՝ 5 անդամ (25%)։

Բուհերի հոգաբարձուների խորհուրդները հասարակական բոլոր քննարումներում վստահեցնում են, որ այն ազդելու է բուհերի ինքավարության վրա։ Այս կարծիքին է նաև ԵՊՀ հոգաբարձուների խորհրդի անդամ Մենուա Սողոմոնյանը, ով Vesti.am-ի հետ զրույցում ասաց, որ սա արվում այն պարագայում, երբ նմանատիպ օրենքը ՀՀ նախագահն ուղարկել է Սահմանադրական դատարան՝ պարզաբանման։ Հարցին, թե բուհերի հոգաբարձուների խորհուրդները, ռեկտորների խորհուրդն արեցին հնարավոր ամեն բան, որ այս որոշումը իրականություն չդառնա, այդ դեպքում ինչպե՞ս ստացվեց, որ հիմա այն իրականություն է, Սողոմոյանը պատասխանեց, որ սա իշխանության կողմից արված հերթական հակասահմանդրական քայլն էր․ «Օրենքի շրջանակներում հնարավոր ամեն բան արել ենք, սակայն հիմա ունենք, այն ինչ ունենք»։ Սողոմոնյանը հիշեցրեց, որ նոյեմբերի 9-ից հետո բուհերի մեծ մասի կողմից Նիկոլ Փաշինյանի հրաժարականը պահանջելը դարձավ բուռն քննարկման առիթ և սա նույնպես կապվեց, նոր տոտալ վերահսկողություն սահմանելու որոշման հետ: Հարցին՝ արդյոք այս որոշումից հետո բուհերը կասեն, թե Նիկոլ Փաշինյանն է վարչապետի իրենց թեկնածուն՝ Մենուա Սողոմոնյանը չբացառեց։ Նշեց՝ իրենց պայքարը շարունակվելու է իրավական հարթության մեջ՝ դատական գործընթաց է սկսվելու, չի բացառվում նաև, որ հանրային պայքար սկսվի։ Մենուա Սողոմանյանը նկատեց նաև, որ սա բուհում նվազեցնում է դասախոսի դերը։