Երվանդ Խունդկարյանը, այսօր ՀՀ ԱԺ-ում ունեցած ճեպազրույցի ժամանակ ասել է, որ շնորհակալ է, որ լրագրողական հանրույթը այսքան համբերատարությամբ սպասում է, որպեսզի ներկայացնի հանրությանը տեղեկատվություն կապված ՍԴ դատավորի ընտրության հետ կապված, ապա հավելել է․ «Ասեմ, որ գործող Սահմանադրությամբ էականորեն փոփոխվել է ՍԴ կազմը համալրելու ընթացակարգը եւ ներկայումս այդ ընթացակարգի համաձայն, ՍԴ-ն պետք է ունենա նաեւ դատավորներ, որոնք առաջադրվում են դատավորների ընդհանուր ժողովի կողմից։ Մենք ունենք մեկ դատավոր՝ առաջադրված եւ ընտրված, պարոն Արման Դիլանյանը, եւ հիմա հերթը երկրորդին է վերաբերվում։ Ընդհանուր ժողովը կարող է առաջադրել միայն եւ միայն դատավորների։ Ինչ վերաբերում է այն հարցին, թե արդյոք կան որեւէ նախնական պայմանավորվածություններ կամ քննարկումներ, պաշտոնապես հերքում եմ, եւ հայտարարում, որ էդպիսի քննարկումներ եւ հավաստիացումներ չեն եղել եւ չեն էլ կարող լինել, որովհետեւ տեսեք թե քանի գործընթաց պետք է անցնի թեկնածուն․ դատավորների ընդհանուր ժողով, դատավորների ընդհանուր ժողովում փակ գաղտնի քվեարկություն, փակ գաղտնի քվեարկության պարագայում «իքս» կամ «իգրեկ» անձի ընտրություն, ներկայացում թեկնածուին ԱԺ-ում, այնտեղ փակ գաղտնի քվեարկություն։ Բացի այդ, ՍԴ նախագահն էլ ընտրվում է դատավորների կողմից։ Այս պայմաններում արդյոք որեւէ պայմանավորվածություն կարող է աշխատել թե ոչ»։

Լրագրողներին հետաքրքրում էր հատկապես Հակակոռուպցիոն մարմնի տված՝ ըստ մամուլի հրապարակումների բացասական եզրակացության հանդեպ Խուկդկարյանի վերաբերմունքը եւ դատավորական գործունեության ընթացքում ունեցած խնդիրներն արդյոք չեն հանգեցնի այն բանին, որ նրա ընտրության հարցը ստվերվի, ինչին Երվանդ խունդկարյանը պատասխանեց, որ ընտրությունը պատգամավորներինն է եւ ինքը չի կարող ներազդել դրանց վրա, իսկ խնդիրների մասով հորդորեց կարդալ ՄԻԵԴ վճիռը։