Մեր ու մեր երեխաների ճակատագրերը խեղաթյուրել են, հանուն հայ ժողովրդի գնացել, կռվել են ու այսօր ոչինչ չեն անում նրանց վերադարձնելու համար, հասկանում եք, շատ դաժան է , «իշխանավորները» ի՞նչ են մտածում մեր տղաներին հետ բերելու համար։ Այս մասին կառավարության մոտ բողոքի ակցիայի ժամանակ ասաց անհետ կորած զինվորների ծնողներից մեկը:

Դիտարկմանը՝ պաշտոնյաներից ձեզ տեղեկացրել են՝ հնարավոր է, որ ձեր որդիները ողջ լինեն, նա ասաց. «Մենք ենք իրենց ապացուցել, որ այո, մեր որդիները ողջ են, որ իրենց բոլոր ասածները սուտ են, որ իրենց վրիպակների պատճառով է այսքան բան եղել: Մենք ապացույցներ, փաստեր, փաստարկներ ունենք, հենց այնպես չենք խոսում, թե գիտեք ոնց, մեր երեխան ողջ է բերեք, հասկանում ենք, պատերազմ է եղել։

Ես տեսանյութով տեսել եմ, թե ինչպես են իմ որդուն գերեվարում։ Իսկ գերեվարումից հետո քննչական ֆոտոռոբոտ փորձաքննությունը քննիչների կողմից սխալ փորձաքննության պատճառով ուրիշի անունը կպցրեցին իմ որդու անվան, հետ ուղարկեցին Ադրբեջան: Եկավ այդ տղան, ասաց՝ ինքը ընդհանրապես կապ չունի այս տեսանյութի հետ ու որ ինքն այլ տեղում է գերեվարվել»,- պատմեց անհետ կորածի մայրը:

Նրա խոսքով՝ նման վրիպակների պատճառով իրենք արդեն հինգերորդ տարին է, չեն լսում իրենց երեխաների ձայնը և որ տառապանքը շատ դաժան է:

Անդրադառնալով ԱԺ-ում տեղի ունեցած քննարկումներին ծնողների հետ, նա ասաց, որ իր ոչ մի հարցի չեն կարողացել պատասխանել և որ իր բոլոր հարցերը մնացել են անպատասխան: «Մեր աչքի առաջ կանգնում, ասում էին՝ աշխատում ենք, աշխատում ենք: 5-րդ տարին անգամ չեք կանչել հարցաքննել, թե տղայիս ով տեսավ, ով գլուխը կապեց, ով էր կողքը: Այդ ամբողջ տեղեկությունները ես եմ ձեզ տվել, մենք ենք հավաքել, ամուսինս է եղել տվյալ տարածքում, որտեղից գերեվարել են որդուս: Քանի անգամ ԱԻՆ-ի, Կարմիր խաչի, ռուս խաղաղապահների, Ադրբեջանի հետ  է եղել, որ այնտեղ ոչինչ չեն գտել: Բա ո՞ւր է լավ իմ որդին»,- ասաց նա:

Նա նշեց, որ իրենք մինչև վերջ գնալու են ու որ իրենց երեխաները պետք է տուն վերադարձվեն:  «Մենք կոտրվող չենք, մեզ ուզում են կոտրել, մեր մեջքը ուզում են կոտրել, բայց չեն կարող, մենք մինչև վերջ գնալու ենք, մեր երեխաները տուն պիտի բերվեն: Ես չգիտեմ՝ ով է սրա գլխավերևում կանգնած, չգիտեմ՝ կոնկրետ ում անունը տամ, ասում եմ՝ երկրի տերերը՝ «իշխանավորները», մեր մեջքը կոտրողները, մեզ մեր լույսից ու օդից կտրողները, թող իրենք իմանան, թե իրենք ով են։ Իրենց վրիպումների պատճառով, բոլոր սխալների պատճառով, մենք այսօրն ենք ընկել»,- ասաց նա: