Հանրապետության նախագահ Արմեն Սարգսյանն այսօր մասնակցել է Արաբական Միացյալ Էմիրությունների և ՄԱԿ-ի արդյունաբերության զարգացման կազմակերպության (UNIDO) համանախագահությամբ կազմակերպված՝ Արտադրության և ինդուստրացման գլոբալ գագաթնաժողովին (GMIS2020): Այս մասին հայտնում է նախագահի աշխատակազմը։

«Հայաստանն առաջին քրիստոնյա երկիրն է աշխարհում։ Մենք ունենք էթնիկ, կրոնական, էկո սննդի զբոսաշրջություն մեր երկրում, որը, սակայն, տուժել է համավարակից: Համավարակն այսօր առկա է, քանի որ աշխարհը փոխկապակցված է, մենք շատ ենք ճանապարհորդում։ Բոլոր նախապայմանները կան, որ վիրուսը շատ արագ տարածվի աշխարհում։ Կորոնավիրուսը մեզ հիշեցնում է, որ աշխարհը փոխվում է։ Մենք խաչմերուկում ենք և չգիտենք՝ ա՞ջ գնանք, թե՞ ձախ, ո՞ւմ հետ գնանք, այս աշխարհը միաբևե՞ռ է, երկբևե՞ռ, թե՞ բազմաբևեռ։ Եվ ես մտահոգված եմ այդ անորոշությունից, քանի որ անորոշության վիճակում, եթե կորցնում ես քո առողջ բանականությունը, մարդկային արժանապատվությունը, շատ հեշտ է քո սխալների համար մեղադրել ուրիշներին»,-ասել է նախագահ Սարգսյանը։

«Մինչ Հայաստանը պայքարում է կորոնավիրուսի դեմ, մեր հարևան Ադրբեջանը, որը ևս պայքարում է վարակի դեմ, Հայաստանի հետ սահմանին սկսեց ռազմական գործողություններ։ Որտե՞ղ է առողջ բանականությունը։ Մեր մյուս հարևանը՝ Թուրքիան, հանդես եկավ կոշտ հռետորաբանությամբ, որը, որպես հայ, ինձ անհանգստացնում է և տանում 105 տարի հետ, երբ Օսմանյան կայսրությունում իրագործվեց Հայոց ցեղասպանությունը։ Ինձ նաև անհանգստացնում է այն, որ ադրբեջանցի պաշտոնյաները սպառնում են հարձակում գործել Հայաստանի ատոմակայանի վրա։ Վերջինիս ռմբակոծումը վնաս կհասցնի ոչ միայն Հայաստանին, այլև մեր բոլոր հարևաններին՝ մինչև Ծոցի երկրներ և կդառնա Չեռնոբիլ տարածաշրջանի համար։ Հույս ունեմ, որ հին աշխարհից նորին անցնելու փոխակերպման այս դժվարին ընթացքում մենք չենք կորցնի մեր ողջախոհությունը, կվարվենք մարդկայնորեն՝ կենտրոնանալով ապագայի վրա և կարժևորենք նախկինում մեր ստեղծածը»,- ասել է ՀՀ նախագահը։