Տնտեսական հարցերի մշտական հանձնաժողովի այսօրվա նիստում ընդգրկված հարցերից էր նաև «Պետական գույքի մասնավորեցման 2017-2020 թվականների ծրագրի մասին» ՀՀ օրենքում փոփոխություններ կատարելու մասին օրենքի նախագիծը: Հարցը ներկայացրեց Պետական գույքի կառավարման կոմիտեի նախագահի տեղակալ Վարդան Կոստանյանը, քանի որ կոմիտեի նախագահ Նարեկ Բաբայանն արձակուրդում էր:

Հանձնաժողովի նախագահ Բաբկեն Թունյանը հիշեցրեց հարցի նախապատմությունը՝ նկատելով, որ այս օրենքի փոփոխությամբ՝ ԱԺ-ն կառավարությանը հնարավորություն է տալու, որպեսզի առողջապահական պրոֆիլի հիմնարկների մասնավորեցման ժամանակ կառավարությունն ինքը որոշի՝ այդ պրոֆիլը պահպանվո՞ւմ է,  թե՞ ոչ.

«Հիմա գործող կարգով առողջապահական հիմնարկների պրոֆիլը պարտադիր պահպանվում է, և նպատակահարմարությունը հետևյալն էր, որ այստեղ  անհրաժեշտություն կա ճկունություն ապահովելու և որոշումների գործընթացն արագացնելու:

Հանձնաժողովի առաջին նիստում այս  նախագծի հետ կապված ասացինք, որ այս փոփոխությունը փաստացի ԱԺ-ի դերը նվազեցնում է, այսինքն՝ այն, ինչ ԱԺ-ն պետք է որոշեր, կառավարությունն ասում է՝ վերցրեք-տվեք մեզ: Առաջարկեցինք Պետգույքի կոմիտեին՝ 2 ամիս ժամկետով հետաձգել և այդ ընթացքում գտնել այնպիսի լուծում, որը ճկուն կլինի ու ԱԺ-ի դերը չի նվազեցնի»:

Վարդան Կոստանյանը ներկայացնելով հարցը՝ նշեց. «Կոնկրետ 8-րդ հոդվածի մասին է խոսքը, որով առաջարկում ենք  մասնավորեցման ցանկում գտնվող Առողջապահական  բուժհիմնարկների հիմնական ուղղության պահպանման և ժամկետների լիազորությունը  վերապահել կառավարությանը: Կուզեի ընդգծել, որ տվյալ օրենքն ընդունվել է 2017 թվականին  և հիմնականում կապված է եղել նրա հետ, որ թվով 13 առողջապահական ընկերւթյուններ միանգամից մտել են մասնավորեցման ցանկի մեջ: Քանի որ այժմ գտնվում ենք մասնավորեցման ծրագրի ավարտական փուլում, և մնացել է կոնկրետ  թվով հինգ առողջապահական ընկերություններ, որոնց մասնավորեցման նախապատրաստման աշխատանքներում  ի հայտ են եկել մի շարք խնդիրներ. դա է ստիպել, որ կառավարությունը նման հարցով դիմի ԱԺ-ին»:

Նկատենք՝ այդ թվով հինգ առողջապահական ընկերություններն են՝ «Վնասվածքաբանության և օրթոպեդիայի գիտական կենտրոն» ՓԲԸ-ն, «Ռադիոիզոտոպների արտադրության կենտրոն»-ը, «Հանրապետական անձավաբուժական կենտրոն» ՓԲԸ-ն, «Նևրոզների կլինիկան»,  «Կուրորտաբանության և Ֆիզիկական Բժշկության Գիտահետազոտական Ինստիտուտ»-ը:

Ըստ Վ. Կոստանյանի՝ ԱՆ մասնագետների հետ խորհրդակցելուց հետո եկել են այն եզրակացության, որ առնվազն 4 ընկերությունների պրոֆիլի պահպանման խնդիր չկա. «Բացի «Ռադիոիզոտոպների արտադրության կենտրոնից»:

ԱԺ «Բարգավաճ Հայաստան» խմբակցության պատգամավոր Միքայել Մելքումյանի համոզմամբ՝ տվյալ կառույցների մասնավորեցման հարցին անդրադառնալուց առաջ անհրաժեշտ է համակողմանի վերլուծություն.

«Պետք է տեսնել այդ դինամիկան՝ թե վերջին 3, 4 , 5 տարում ինչի՞ց ինչի է վերածվել, և եթե շուկայում ծառայությունները մատուցող այլընտրանքներ են առաջացել (դա ծառայությունների շուկա է, չէ՞),  եթե դա վերանում է, ուրեմն նշանակում է՝ այդ ծառայությունը տեղաբաշխված է այլ բժշկական կենտրոններում, և այլն: Միտումնավո՞ր է արվել, կառավարո՞ւմն է շատ անարդյունավետ կատարվել, դա պետք է պարզաբանվի:

Կարծում եմ՝ ներկայացումը պետք է համակողմանի լինի, իսկ  կողմ եմ, որ պետք չի՝ ԱԺ-ն զրկվի պրոֆիլը որոշելու գործառույթից. ի՞նչ է եղել, թող անպայման հրապարակային ամեն ինչ արվի, որպեսզի հարցեր չառաջացնի»:

Նույն խմբակցությունից Արտյոմ Ծառուկյանն էլ հավելեց. «Ես կտրականապես դեմ եմ մի հիմնարկության մասնավորեցման մասին խոսել (կապ չունի` պրոֆիլը պահպանվո՞ւմ է,  թե՞ չէ ), առանց էդ հիմնարկության աշխատողների ապագայի հետ կապված կոնկրետ տեսլականի:

Դուք տեսեք՝ հիմա ինչ ազդակ եք հաղորդում՝ որպես կառավարության ներկայացուցիչ. մեզ ասեք, այդ հիմնարկության աշխատողները լսելու են, ու լսելու են Ձեզ՝ որպես կառավարության ներկայացուցչի, որ Դուք ասում եք՝ ես չգիտեմ՝ էդ մարդկանց ճակատագիրն ինչ է լինելու:

Մենք պահանջում ենք ձեզնից, որ մենք նույնպես պետք է իմանանք՝ ինչ է լինելու այդ մարդկանց ճակատագիրը»:

«Իմ քայլը» խմբակցության պատգամավոր Արտակ Մանուկյանն էլ կարծում է, որ որոշում կայացնելու համար պետք է լինի մեթոդաբանություն. «Իհարկե, ես ինքս էլ կողմնակից եմ, որ մենք ունենանք վերահսկողության բոլոր գործիքները, բայց խնդրում եմ, ինձ ասեք՝ ի՞նչ չափորոշիչներով է ելնելու հանձնաժողովը, երբ որոշում է կայացնելու. երբ քաղաքականության իրականացնողը գտնում է՝ ինքն արդյունավետ չի կառավարելու և դրա համար ուզում է արդյունավետ կառավարման փոխանցի գույքը սեփականատիրոջը, և դուք ելնելով այդ կանխադրույթից՝  որոշելու եք, որ այստեղ պետք է պրոֆիլը պահպանվի, այստեղ պետք է պրոֆիլը չպահպանվի, որո՞նք են այն չափորոշիչները. եթե  մենք ստանձնում ենք որոշակի գործիքակազմ որոշում կայացնելու, այդ որոշում կայացնելու համար պետք է լինի մեթոդաբանություն»:

Հարցը դրվեց քվեարկության.  նախագիծը չընդունվեց: