Հայաստանի ավանդական երգի-պարի «Գութան» ամենամյա փառատոնն այս տարի կանցկացվի սեպտեմբերի 25-26-ը Տավուշի մարզի սահմանապահ 13 համայնքներում՝ Բաղանիս, Կոթի, Բերդավան, Ոսկեպար, Բերքաբեր, Վազաշեն, Պառավաքար, Այգեպար, Ներքին Կարմիրաղբյուր, Արծվաբերդ, Մովսես, Այգեպար, Չինարի և Բերդ քաղաքում:

Փառատոնին այս տարի կմասնակցի 14 խումբ՝ «Ակունք», «Սասնա Ծռեր», «Վան», «Արդվին», «Մասունք, «Նուբար», «Վերադարձ», «Գորանի», «Վարք Հայոց», «Սեբաստացիներ», «Մարաթուկ», «Արեգ» և «Մարաթուկցիներ», «Տավրոս»:

«Ակունք»-ը ելույթ կունենա  սեպտեմբերի 25-ին Բաղանիս, Կոթի, Բերդավան համայնքներում, սեպտեմբերի 26-ին՝ Ոսկեպար համայնքում։  Իսկ մյուս 13 համույթներից  յուրաքանչյուրը սեպտեմբերի 26-ին ելույթ կունենա սահմանապահ  մեկ համայնքում՝ մեկ խումբ-մեկ համայնք ձևաչափով, այնուհետև բոլոր խմբերը միասին ելույթ կունենան Բերդում, որտեղ կկայանա գլխավոր համերգը: Շուրջ 250 արտիստներ իրենց ավանդական, հայրենասիրական, ոգեկոչող և ժողովրդական երգ ու պարով մակութային տոն կպարգևեն սահմանապահ տավուշցիներին։

Փառատոնի հիմնադիր-ղեկավար, ՀՀ վաստակավոր արտիստ Արսեն Գրիգորյանը MegaNews.am-ի թղթակցի հետ զրույցոում  ընդգծեց՝  այս տարի ՀՀ ԿԳՄՍ նախարարության աջակցությամբ, իրականանում է վեց տարի փայփայած՝ իր  երազանքներից մեկը․ «Գութան»-ը կանցկացվի սահմանապահ Տավուշում:

«Մենք մեծ ջանքեր գործադրեցինք, գործուն ջանքեր գործադրեց նաև  ԿԳՄՍ փոխնախարար Արա Խզմալյանը, և արդյունքում ԿԳՄՍ նախարարությունն աջակցեց «Գութան»-ին։ Ես երազում եմ և հույս ունեմ, որ առաջիկա տարիներին «Գութան»-ը կանցկացվի նաև մյուս մարզերում։ Շատ կարևոր է, որ մարզերում բնակվող մեր հայենակիցները հաղորդակից լինեն մեր ազգային երգ ու պարին։  Մարզերում բնակվող մեր հայրենակիցներից շատերը հնարավրություն չունեն հաճախակի մասնակցել մշակութային միջոցառումների, ուստի անհրաժեշտ է հաճախ  մշակութային միջոցառումներ անցկացնել մարզերում։ Այս տարի մենք  մեր սերն ու էներգիան կփոխանցենք Տավուշի մարզի մեր սահմանապահ հայրենակիցներին ու մեր զինվորներին։ Իհարկե, փառատոնի միջոցով մենք նաև մեր  երախտագիտությունն ենք հայտնում մեր հայրենիքի դարպասներն ամուր ու անառիկ պահող տավուշցիներին ու մեր  քաջ զինվորներին։ Մենք հանգիստ ապրում ենք Երևանում, իսկ իրենք Ադրբեջանի հետ սահմաններն ամուր են պահում, մեր երկրի թիկունքն են ամուր պահում․ մենք շատ շնորհակալ ենք նրանց», —  նշեց Արսեն Գրիգորյանը։

Այս տարի համավարակի պայմաններում «Գութան»-ը կազմակերպելը բարդ է եղել, բայց համերգի կազմակերպիչներն՝ Արսեն Գրիգորյանի գլխավորությամբ, չեն ընկրկել և հաղթահարել են բոլոր դժվարությունները։ 

«Ամենամեծ խնդիրը նախ անորոշությունն էր,  բայց երբ վերջնականապես հաստատվեց, որ այս տարի ևս «Գութան»-ը կկայանա, փառատոնի մասնակից խմբերը սկսեցին պատրաստվել։ Իրականում դա այնքան էլ հեշտ չէ․ պատկերացրե՛ք, այս մի քանի ամիսների ընթացքում   խմբերը պարապուրդի էին մատնված, և հեշտ չէր  համերգին նախապատրաստվելը, բայց  ակտիվ աշխատանքների շնորհիվ այս խնդիրը հարթվեց։ Իհարկե, եղան նաև այլ խնդիրներ՝ հատկապես  փառատոնի ֆինանսավորման հետ կապված։ «Գութան»-ը մշակութային միջոցառում է, որևէ կոմերցիոն տարր չունի, և շատ կարևոր է, որ մենք աջակիցներ ունենանք, որպեսզի կարողանանք այս փառատոնն անցկացնել, պահպանել ու սերունդներին փոխանցել մեր մշակույթը,  ազգային երգն ու պարը։ Մենք ուրախ ենք, որ ամեն տարի մեր աջակիցների թիվն ավելանում է։ Ուրախությամբ կարող եմ նշել, որ այս  տարի մեզ միացան, աջակցեցին նոր կազմակերպություններ»  —  ընդգծեց Արսեն Գրիգորյանը՝ հատուկ շնորհակալություն հայտնելով  «Գութան» ազգային երգի-պարի բոլոր աջակիցներին՝ ՀՀ ԿԳՄՍ նախարարությանը, Երևանի քաղաքապետարանին, «Երեմյան Փրոջեքթս» ընկերությանը, «Ice house» ընկերությանը, «Развитие» հիմնադրամին, «ՍԱՍՏԵՔՍ» ընկերությանը, «Արմֆուդ» ընկերությանը, «Զեբրա» ընկերությանը, «Նուշիկյան ասոցիացիա» ընկերությանը, «Հանրային», «Ար»,   «Շողակաթ», «Երկիր մեդիա», « Թիվ 5» հեռուստաընկերություններին,  Տավուշի մարզպետարանին, Տավուշի թեմին, Արամ Սողոմոնյանին, Լևոն Բեկ-Նազարյանին, Վարդան Դաշտոյանին և Սմբատ Մուղդուսյան։

Արսեն Գրիգորյանն ընդգծեց, որ Տավուշի մարզում անցկացվող փառատոնը տեխնիկապես ոչնչով չի զիջելու նախորդ տարիներին Երևանում կամ Արցախում անցկացված փառատոններից։

«Սյսինքն՝ բեմը,  տեխնիկական ու լուսային հնարավորությունները և  համերգային  ծրագիրը ոչնչով  պակաս չեն լինելու լինելու նախորդ տարիներին անցկացված փառատոններից։ Բեմը, տեխնիկական բոլոր սարքերը,  պարագաները Երևանից Տավուշ են տեղափոխվելու։ Բոլորին հրավիրում  ենք  Տավուշ՝ մասնակցելու «Գութան»-ին, հաղորդակից լինելու մեր ազգային արժեքներին, մեր հարուստ մշակույթին», — նշեց Արսեն Գրիգորյանը։

Նա նշեց՝ փառատոնի ընթացքում պահպանվելու են հակահամաճարակային բոլոր կանոնները, ապա հույս հայտնեց, որ հանդիսատեսը ևս զգոն կլինի և կպապհանի հակահամաճարակային  բոլոր կանոնները։