Բարոնուհի Քերոլայն Քոքսը հայտարարությամբ է հանդես եկել` Լեռնային Ղարաբաղում հակամարտության սրման կապակցությամբ: Հայտարարության մեջ, մասնավորապես, նշվում է.

«Սեպտեմբերի 27-ի վաղ առավոտյան շփման գծի ողջ երկայնքով զանգվածային հրթիռային, հրետանային, անօդաչու եւ օդային ռմբակոծությունների կիրառմամբ զանգվածային ցամաքային եւ օդային հարձակումը սկսելուց հետո մարտերը շարունակվում են արդեն երկրորդ օրը:

Ադրբեջանը նոր հարձակողական գործողություններ է սկսել հյուսիսում` Մատաղիսում, Մարտակերտի տարածքում, ինչպես նաեւ Արաքս գետի հարավում, որոնք հաջողությամբ պաշտպանվում են: Ադրբեջանական կողմում կենդանի ուժի եւ ռազմական տեխնիկայի մեծ կորուստներ կան: Ստեփանակերտի ՊՆ ներկայացուցչի վերջին տվյալների համաձայն` սպանվել է ավելի քան 350 ադրբեջանցի զինվոր, ոչնչացվել է 45 տանկ, տասնյակ անօդաչու թռչող սարք եւ 4 ուղղաթիռ: Հաղորդվում է նաեւ, որ խոցվել է Թուրքիայի ռազմաօդային ուժերի F16 ինքնաթիռը:

Արցախի կորուստները 45 զինվոր եւ հակաօդային պաշտպանության մի մասն են, ինչպես նաեւ տանկեր եւ տեխնիկա: Արցախի հարավում գտնվող Մարտունիում կան զոհված եւ վիրավոր խաղաղ բնակիչներ, այդ թվում` մի տատիկ եւ նրա փոքրիկ թոռը, ովքեր սպանվել են ադրբեջանական նոր ագրեսիայի հենց սկզբում: Սակայն այսօր` ագրեսիայի երկրորդ օրը, երբ հարյուրավոր խաղաղ բնակիչներ վիրավորվել են, շատ քաղաքացիական շենքեր եւ կառույցներ ադրբեջանական անօդաչու, հրթիռային եւ հրետանային հարձակումների թիրախ են դարձել, մոտ 80 մարդ տեղափոխվել է Երեւանի հիվանդանոցներ:

Ադրբեջանը հերթական անգամ զանգվածային եւ անխտիր գրոհ է սկսել ողջ ռազմաճակատի երկայնքով եւ ծանր հրթիռային, հրետանային եւ ավիահարվածներ է հասցրել` այդ թվում հսկայական քանակությամբ թուրքական անօդաչու թռչող սարքեր օգտագործելով Արցախի խորքում:

Նրանք անխղճորեն եւ նույնիսկ կանխամտածված թիրախավորում են քաղաքացիական թիրախները Ստեփանակերտում եւ Արցախի այլ քաղաքներում եւ գյուղերում, այդ թվում` դպրոցներն ու մանկապարտեզները: Հավաստի հաղորդումներ կան Թուրքիայի ռազմական անձնակազմի, ինչպես նաեւ հազարավոր Սիրիայից իսլամիստ ջիհադիստական ահաբեկիչների անմիջական ներգրավվածության մասին, որոնք տեղակայվել են Թուրքիայի կողմից Ադրբեջանի անունից կռվելու համար:

Ե՛վ Արցախը, եւ՛ Հայաստանը դիմել են միջազգային հանրությանը, հատկապես` ԵԱՀԿ Մինսկի խմբին ՝ կոչ անելով միջամտել եւ անմիջապես դադարեցնել Թուրքիայի լայնամասշտաբ ռազմաքաղաքական միջամտությունը Բաքվի շահերից:

Թուրքիան, որը հաճախ հայտարարել է իր քաղաքական եւ դիվանագիտական աջակցության մասին Ադրբեջանի նախկին ագրեսիաներին` նախագահի, արտաքին գործերի եւ պաշտպանության նախարարների մակարդակով, այս անգամ կարծես ուղղակիորեն մասնակցում է ռազմական գործողություններին եւ հարձակողական արշավներին: «Մեկ ազգ` երկու պետություն» կարգախոսը կարծես վերածվել է «մեկ ազգի` մեկ բանակի»:

Արցախի դեմ ագրեսիայի սկզբում Ադրբեջանում ռազմական դրություն էր հայտարարվել. իր իսկ բնակչությանն իրական լուրերի եւ սոցիալական ցանցերի ազատ մուտքից զրկելու բացահայտ մտադրությամբ` Ադրբեջանում ամբողջ ինտերնետ համակարգը կա'մ անջատված է, կա'մ խիստ սահմանափակ` Twitter-ից բացի, որը լայնորեն օգտագործվում է պաշտոնական քարոզչության եւ ապատեղեկատվության համար:

Եվ Ռուսաստանը, եւ Ֆրանսիան կոչ էին անում անհապաղ դադարեցնել ռազմական գործողությունները եւ վերադառնալ Մինսկի խմբի բանակցություններին, ինչպես եւ ԱՄՆ պետքարտուղարությունը»: