ԱԺ-ի այսօր կայացած արտահերթ նիստում երկրորդ ընթերցմամբ ընդունվեց «Իմ քայլը» խմբակցության կողմից ներկայացված ՀՀ աշխատանքային օրենսգրքում փոփոխություններ և լրացումներ կատարելու մասին օրենքի նախագիծը: «Իմ քայլը» խմբակցության պատգամավոր Հերիքնազ Տիգրանյանի խոսքով՝ նախագծի փոփոխությամբ սահմանվել է, որ աշխատանքի էական պայմանները ռազմական դրության ժամանակ կարող են փոխվել, խոսքը վերաբերում է հանրային հատվածի աշխատանքներին.

«Եթե սովորական պայմաններում գործատուն ցանկանում է փոխել աշխատանքի որևէ էական պայման՝ աշխատանքի վայր, ռեժիմ, վարձատրություն և այլն, ապա նախապես տեղեկացնում է աշխատողին, ստանում համաձայնություն և կատարում է փոփոխությունը: Այժմ առաջարկում ենք, որ ռազմական դրության ընթացքում այդ ծանուցելու և համաձայնության մեխանիզմը հանվի այն պարագայում, եթե խոսքը վերաբերում է ռազմական դրության իրավական ռեժիմ ունեցող հիմնարկներին, որոնք են հանրային հատվածի կազմակերպությունները, պետական կառավարման տարածքային և տեղական ինքնակառավարման մարմինները և այն կազմակերպությունները, որոնց կառավարումը ռազմական դրության ժամանակ  անցնում է կառավարաման լիազոր մարմնին»:

Հաջորդ փոփոխությամբ, ըստ Հերիքնազ Տիգրանյանի, սահմանվել է, որ զորակոչային զինվորական ծառայություն անցնելիս կամ կամավոր զինվորագրվելիս այդ ժամանակահատվածի համար, դա կլինի օրեր, շաբաթներ, թե ամիսներ, աշխատողի աշխատած ժամանակահատվածը ոչ միայն ստաժ է լինում, այլև այդ ընթացքում ազատվում է աշխատանքներ կատարելուց և ձեռք բերում արձակուրդային օրեր:

«Օրենքով նախատեսված էր, որ եթե որևէ հանգամանքի բերումով աշխատանքի տեղը պահպանվում է, բայց վճարում չկա, ապա այդ ժամանակահատվածը նրա համար չի ձևավորվում ամենամյա արձակուրդի օրեր, այս օրենքով յուրաքանչյուր ամսվա համար աշխատողը վաստակում է 1.67 հարյուրերորդական արձակուրդի օր, եթե նա, ենթադրենք, կամավոր զինվորագրվելիս երկու ամիս լինի զինվորական ծառայության մեջ, այդ օրերի համար նա կստանա երկու ամիս անգամ 1.67 օր կուտակած արձակուրդի օրեր, որով մենք բարենպաստ ռեժիմ ենք սահմանում աշխատողի համար»:

Մյուս փոփոխությունը, պատգամավորի փոխանցմամբ, վերաբերում է բյուջետային հիմնարկների հանրային հատվածին գիշերային և հանգստյան օրը կատարված աշխատանքի վճարմանը:

«Գործող օրենսդրությամբ սահմանված է, որ արտաժամ աշխատանքի համար բացի հիմնական դրույքաչափից վճարվում է 50 տոկոս, գիշերայինի համար՝ 30 տոկոս և հանգստյան օրվա համար կատարած աշխատանքի համար՝ կրկնակի վարձատրություն, այս պարագայում առաջարկել ենք, որ ռազմական դրության ժամանակահատվածում այդ աշխատանքների համար հավելյալ վարձատրություններ՝ հավելավճարներ չեն տրամադրվում»,- նշեց նա: