Հայ երկու գերիները ժամկետային զինծառայողներ են․ Արտակ Զեյնալյանի խոսքով՝ դեպքի մասին համացանցից են տեղեկացել
Սեպտեմբերի 27-ին Ադրբեջանի կողմից Արցախի դեմ նախաձեռնված պատերազմի ընթացքում գերեվարված Արեգ Սարգսյանն ու Նարեկ Ամիրջանյանը ՀՀ զինված ուժերի ժամկետային զինծառայողներ են՝ ծնված 2001 թվականին։
Այս մասին «Հայկական ժամանակ»-ի հետ զրույցում տեղեկացրեց նրանց ընտանիքի ներկայացուցիչ, իրավաբան Արտակ Զեյնալյանը։
Ըստ նրա՝ գերեվարվելու մասին իրենք տեղեկացել են ադրբեջանական աղբյուրներից, որտեղ եղել են հրապարակումներ, որ զինծառայողները նաեւ վնասվածքներ ունեն։ Թե ինչ աստիճանի կամ բնույթի, Զեյնալյանը չգիտեր․ այդ մասին պաշտոնական տվյալներ առկա չեն։
Հաշվի առնելով նախորդ տարիների փորձը, այդ թվում՝ Ապրիլյան պատերազմի ժամանակ ադրբեջանցիների կողմից ՀՀ ԶՈՒ զինծառայողների խոշտանգման դեպքերը՝ իրավապաշտպանների խումբն այժմ գերեվարվածների կյանքին եւ առողջությանը սպառնացող ռիսկեր էտեսնում․ «Այդ ռիսկերը հաշվի առնելով է, որ մենք միջանկյալ միջոց կիրառելու դիմում ենք ներկայացրել ՄԻԵԴ, դրանք իրական ռիսկեր են։ Մենք հղում ենք կատարել նախորդ փորձին՝ նշելով, որ ադրբեջանական իրավազորության ներքո հայտնված անձանց կյանքին վտանգ է սպառնում, եւ այդ հիմքով է, որ պահանջել ենք հումանիտար հրադարարի համաձայնագրի հիման վրա նրանց հանձնել ՀՀ-ին»: Թե որքանով արժանահավատ կլինեն միջանկյալ միջոցի շրջանակում Ադրբեջանից ակնկալվող տեղեկությունը, Զեյնալյանը չշտապեց գնահատել՝ նշելով, որ չեն կարող կանխակալ վերաբերմունք ունենալ․ պիտի ստանան այդ տեղեկությունները, նոր միայն դրանց վերաբերյալ դիրքորոշում հայտնեն։
Արտակ Զեյնալյանի խոսքով՝ այս պատերազմի վերաբերյալ ՄԻԵԴ-ում քննվող գործերով հղում է կատարվելու նախկինում քննված այն գործերին, որոնց շրջանակում Եվրոպական դատարանը հաստատված է համարել ազգային ատելության շարժառիթով սպանության փաստը։ Այդպիսի վճիռներ կայացվել են, օրինակ, ադրբեջանցիների կողմից ՀՀ քաղաքացի, Թթուջուր գյուղի հովիվ Մանվել Սարիբեկյանի խոշտանգման կամ ՀՀ ԶՈՒ սպա Գուրգեն Մարգարյանի կացնահարման վերաբերյալ գործերով։
Հիշեցնենք` ավելի վաղ Արտակ Զեյնալյանը հայտարարել է, որ գերեվարված զինծառայողների ընտանիքի անդամների անունից հոկտեմբերի 10-ին իրավապաշտպանների խումբը հրատապ միջոց կիրառելու պահանջով դիմել է Մարդու իրավունքների եվրոպական դատարան: Վերջինս դիմումը ստացել է, ծանուցել Ադրբեջանի Կառավարությանը եւ տեղեկություններ պահանջել զինծառայողների պահման պայմանների, առողջական վիճակի եւ փոխանակման հնարավորության մասին։ Հարցադրումներին պատասխանելու համար Ադրբեջանի կառավարությանը տրվել է վերջնաժամկետ մինչեւ հոկտեմբերի 22-ը։
