Վրաստանի արտաքին գործերի նախարարությունը կրկին հերքել է ԶԼՄ-ներում հայտնված լուրերն այն մասին, որ վրացական օդային տարածքը կարող է օգտագործվել ռազմական բեռները Հայաստան և Ադրբեջան տեղափոխելու համար, գրում է «ՌԻԱ Նովոստի»-ն:

«Վերջին օրերի ընթացքում ԶԼՄ-ներում, ցավոք, շարունակվում են շահարկումները Վրաստանի օդային տարածքով ռազմական փոխադրումների հնարավորության վերաբերյալ: Վրաստանը փակել է իր օդային տարածքը ռազմական բնույթի թռիչքների համար: Ինչ վերաբերում է քաղաքացիական և հումանիտար թռիչքներին, այս ուղղությամբ Վրաստանը կատարում է իր միջազգային պարտականությունները: Ցանկանում ենք պարզաբանել, որ նման թռիչքները հատուկ թույլտվություն չեն պահանջում, քաղաքացիական թռիչքներն իրականացվում են օդային տարածքում՝ համապատասխան տեղեկության ներկայացման և ծանուցման հիման վրա»,- ասվում է նախարարության հաղորդագրությունում:

Վրաստանի ԱԳՆ-ն կոչ է արել ինչպես բեռն ընդունող երկրներին, այպես էլ ուղարկողներին խստորեն վերահսկել փոխադրումները՝ օդային փոխադրումների անվտանգությունն ապահովելու և քաղաքացիական թռիչքներն այլ նպատակով օգտագործելը կանխելու նպատակով:

Ավելի վաղ Վրաստանի իշխանությունները հայտարարել էին, որ իրենց տարածքը ռազմական տեխնիկայի փոխադրման  համար օգտագործելու արգելք են սահմանել Հայաստանի և Ադրբեջանի միջև հակամարտության վերսկսման ֆոնին:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 17-ի դրությամբ Արցախի զինուժը խոցել է հակառակորդի՝ 16 ուղղաթիռ, 22 ինքնաթիռ, 186 անօդաչու թռչող սարք, 554 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 6109 զոհ։ Հայկական կողմից, նախնական տվյալներով, կա 633 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 33 քաղաքացիական անձ, վիրավորվել է 106 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։ Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում: