Միացյալ Նահանգներում հեռարձակվող Cheddar հեռուստաալիքի լրատվական մեկնաբան Հենա Դոբան Greenwich Media Strategies խորհրդատվական կենտրոնի տնօրեն Հագար Չեմալիի հետ եթերում զրուցել է Արցախի դեմ թուրք-ադրբեջանական հարձակումների մասին:

«Սա շատ կարևոր հարց է, որը դարերի պատմություն ունի, սակայն այն խնդիրը, որի մասին հիմա խոսում ենք, ի հայտ է եկել Իոսիֆ Ստալինի օրոք, երբ նա ձևավորում էր Խորհրդային Միությունը: Նա ցանկանում էր, որ Թուրքիան աջակցի Խորհրդային Միությանը, այդ պատճառով էթնիկ հայերի հայրենիքը կցեց Ադրբեջանին:

Սա պարզապես երկու կողմի կռիվ չէ հողատարածքի համար: Սա հայկական էթնիկ համայնքի գոյապայքարն է: Նրանք պայքարում են ապրելու համար: Այս պայքարի կարևոր կետերից է Թուրքիայի միջամտությունը: Թուրքիան բորբոքում է հակամարտությունը և սիրիացի վարձկանների է տեղափոխում այնտեղ: Դա իրավիճակը սարսափելի վտանգավոր է դարձնում»,- շեշտել է Չեմալին:

Վերջինս հավելել է, որ Ռուսաստանը ջանքեր է գործադրում հրադադար հաստատելու ուղղությամբ և չի ցանկանում բռնություն տեսնել տարածաշրջանում:

Չեմալին առանձին շեշտել է ԱՄՆ-ի դերակատարությունը միջազգային անվտանգության պաշտպանության գործում և նշել, որ չնայած դրան ԱՄՆ-ն ռազմական օգնություն է հատկացնում Ադրբեջանին: Նա հիշեցրել է նաև, որ 2017 թվականին թուրքերը հարձակվել են խաղաղ ցուցարարների վրա Վաշինգտոնում:

«Եթե Թուրքիային թույլ տանք այդպես վարվել, նրանք կմտածեն, որ կարող են անել ինչ ցանկանան, դա անթույլատրելի է», -հավելել է փորձագետը:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 20-ի դրությամբ Արցախի զինուժը խոցել է հակառակորդի՝ 16 ուղղաթիռ, 23 ինքնաթիռ, 200 անօդաչու թռչող սարք, 576 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 6309 զոհ։ Հայկական կողմից, նախնական տվյալներով, կա 772 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 36 քաղաքացիական անձ, վիրավորվել է 115 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։

Արդեն երկու անգամ հայտարարվել է մարդասիրական հրադադարի մասին, սակայն ադրբեջանական զինուժը դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։