«Հայաստանի քրիստոնեա-դեմոկրատական միություն» կուսակցության նախագահ, ՀՀ նախկին վարչապետ Խոսրով Հարությունյանը, անդրադառնալով Արցախի նախագահ Արայիկ Հարությոնյանի կողմից ՌԴ նախագահ Վլադիմիր Պուտինին ուղղված դիմումին, կարծում է՝ դրան նախորդել են որոշ կարևոր գործոններ։

Meganews.am-ի հետ զրույցում Խոսրով Հարությունյանն ընդգծեց՝ Արցախի նախագահ Արայիկ Հարությունյանն այսօր առավել, քան որևէ մեկը տիրապերում է Արցախում տիրող իրավիճակին, զգում մարտական գործողությունների հնարավոր զարգացումները։ Մյուս կողմից՝ չափազանց կարևոր էին երեկ՝ ՌԴ նախագահ Վլադիմիր Պուտինի՝ «Վալդայ» ակումբի հարթակում հնչեցրած մեկնաբանությունները։

«Պուտինի մեկնաբանություններին անդրադառնալով՝ պետք է նշել՝ մասնավորապես, նա շեշտեց՝ այս պատերազմն օր առաջ պետք է դադարեցվի․ երկու կողմում էլ զոհերը սարսափելի մեծ են, ու դա հանգեցնելու է հումանիտար և այլ աղետների։ Մյուս կողմից՝ Պուտինը պնդեց, որ այս խնդիրը քաղաքական կարգավորումից զատ՝ այլ լուծում ունենալ չի կարող, այսինքն՝ պատերազմով, ռազմական ճանապարհով այս հակամարտությունը չի կարող կարգավորվելլ, և իզուր չի ասվել, որ եթե 30 տարի բանակցությունները ոչինչ չեն տվել, դա դեռ չի նշանակում, որ պետք է կրակվել։ Այսինքն՝ կա հաստատ համոզմունք, որ խաղաղ բանակցային կարգավորմանն այլընտրանք չկա։ Երրորդ՝ ըստ էության, ընդգծվեց, որ այս կոնֆլիկտը տարածքային վեճ չէ հայերի ու ադրբեջանցիների միջև, այն իրականում պայմանավորվաած է արցախահայության՝ իրենց տարածքներում անվտանգ ապրելու իրավունքի հետ, թեպետ հանուն արդարության պետք է ասնենք, որ ՌԴ նախագահն ասաց՝ Ադրբեջանի հանրապետության տարածնքերից որոշ մաս բռնագրավված է եղել ու գտնվել է հայկական կողմի հսկողության տակ, այիսնքն՝ կարծում եմ՝ ինքը ուրվագծում էր համանախագահների, միջնորդների ընկալումները», — նշեց Խոսրով Հարությունյանը։

Նա ընդգծեց՝ հավանաբար, հաշվի առնելով վերը նշված գործոնները և այն փաստը, որ վարչապետ Փաշինյանն ու Ալիևն իրենց համաձայնությունն են տվել ռուսական խաղաղապահ զորքերի տեղակայմանը՝ Արայիկ Հարությունյանը փորձել է դիմել Ռուսաստանին։ Խոսրով Հարությունյանի խոսքով՝ ըստ էության, ակնհայտ է դառնում, որ Ղարաբաղը նույնպես գտնում է, որ տարածաշրջանում հիմնական աշխարհաքաղաքական կոնֆիգուրացիայի ճարտարապետը Ռուսաստանն է, և հենց այդ երկիրն է տարածաշրջանի կայունության, անվտանգության գլխավոր երաշխավորը, հետևաբար՝ Ղարաբաղը նույնպես համաձայն է, ուստի և դիմում է ՌԴ նախագահին, որպեսզի նա ձեռնարկի գործնական քայլեր՝ ռազմական գործողությունները կանգնեցնելու համար, իսկ այդ գործնական քայլը խաղաղապահների տեղակայումն է։

«Այսինքն՝ ես հասկանում եմ, որ այս նամակով Արցախի ռազմաքաղաքական ղեկավարությունը այսպես արտահայտում է իր համաձայնությունը՝ ռազմական գործողությունները հրատապ կասեցնելու ակնկալիքով՝ խաղաղապահ ուժերի տեղակայմանը։ Ես, ճիշտն ասած, այսպես եմ հասկացել նախագահ Արայիկ Հարությունյանի դիմումը։ Արցախի նախագահ Արայիկ Հարությունյանը, դիմելով ՌԴ նախագահ Վլադիմիր Պուտինին, ըստ էության, միաժամանակ դե ֆակտո ընդգծում է Արցախի սուբյեկտայնությունը ու դրան նպաստել է նաև Պաշտպանության բանակի կարևոր գործոնն այս պատերազմում։ Արցախի պաշտպանության բանակը մարտնչում է թուրք-ադրբեջանական և ահաբեկչական ուժերի դեմ։ Իսկ Արցախի ՊԲ-ն ընդգծում է Արցախի Հանրապետության իրավաքաղաքական սուբյեկտայնությունը

Մի բան պարզ է՝ ՌԴ-ն շահագրգռված է, որ տարաշածրջանում խաղաղութություն լինի։ Հավանաբար, հայ քաղաքական միտքը պետք է ձերբազատվի անիրատեսական այնպիսի սպասելիքներից, թե Արևմուտքն է մեր փրկիչը կան աջակցողը, քանի որ մենք տեսանք՝ Արևմուտքը բացի հայտարարություններից՝ գործնականում որևէ քայլ չարեց ու չի էլ կարող անել։ Այսպես ասած՝ հավաքական Արևմուտքը Հարավային Կովկասն ընկալում է որպես ՌԴ աշխարհաքաղաքական ազդեցության անքակտելի բաղադրիչ»։ Խոսրով Հարությունյանն ընդգծեց՝ հայ-ռուսական հարաբերություններին պետք է խնամքով վերաբերվել, իսկ այս պատերազմից պետք է դասեր քաղեն բոլորը՝ այդ թվում՝ ՌԴ-ն, որպեսզի թույլ չտա, սանձի Թուրքիային, որ տարածաշրջանում նման լայնածավալ պատերազմական գործողություններ այլևս չկրկնվեն ու տարածաշրջանում ժամանակային լայն հորիզոններում խաղաղություն պահպանվի։

Հասմիկ Սարգսյան