Նյու Յորքում, ինչպես նաև ամերիկյան մի շարք այլ նահանգներում, ընտրատեղամասերը բաց են առավոտյան ժամը 6:00-ից, սակայն դրանց մոտ արդեն իսկ ընտրողների ոչ մեծ հերթեր են նկատվում, գրում է ՏԱՍՍ-ը։

«Հերթերն առաջին հերթին, իհարկե, կուտակվում են ընտրատեղամաերի տարածքում միաժամանակ գտնվող մարդկանց քանակի սահմանափակման պատճառով։ Մենք աշխատում ենք միաժամանակ առավելագույնը 15 մարդ ներս թողնել», - ՏԱՍՍ-ի հետ զրույցում բացատրել է ընտրատեղամասի աշխատակիցը։

Շատերը նախագահական ընտրությունների օրն աշխատանքի չեն գնում, սակայն կան մարդիկ, որոնք ստիպված են աշխատել, ուստի գերադասում են մինչ աշխատանքի գնալը քվեարկել։ Ընդ որում՝ ընտրողներից մեկի խոսքով՝ քիչ անց հերթերն ավելի մեծ կլինեն։

Ինչպես նշում է աղբյուրը, Նյու Յորքը համարվում է դեմոկրատական քաղաք, ուստի այստեղ շատերը Ջոզեֆ Բայդենի կողմնակիցներն են։ Ընտրողներից մեկի խոսքով՝ ինքը փոփոխությունների է սպասում, քանի որ «այն, ինչ այժմ տեղի է ունենում, առնվազն ստորացուցիչ է»։ Միևնույն ժամանակ կան նաև գործող նախագահի համակիրներ, որոնք պատրաստվում են իրենց ձայնը տալ Հանրապետական կուսակցությանը։

Աղբյուրը հավելում է, որ առայժմ քաղաքում իրավիճակը հանգիստ է, սակայն շատերը ենթադրում են, որ նախագահական ընտրություններին կհաջորդեն բողոքի ցույցերն ու անկարգությունները։ Նոյեմբերի 3-ին ընդառաջ Մանհեթենում խանութների մեծ մասը փակվել է, իսկ պատուհանները ծածկվել պաշտպանիչ վահաններով՝ կանխելու համար ավազակային հարձակումները հնարավոր անկարգությունների ժամանակ։

Հիշեցնենք, որ 2020 նոյեմբերի երեքին ԱՄՆ-ում մեկնարկել են երկրի պատմության մեջ 59-րդ նախագահական ընտրությունները։ ԱՄՆ գործող նախագահ Դոնալդ Թրամփի մրցակիցը ԱՄՆ նախկին փոխնախագահ, դեմոկրատ Ջո Բայդենն է: