Ջո Բայդենն իր ընտրարշավի հենասյունն էր դարձրել կուսակցությունների միջև տարաձայնությունները վերացնելը: Եթե ԱՄՆ նախկին փոխնախագահն իսկապես ցանկանա կատարել իր խոստումն արտաքին քաղաքականության ասպարեզում, ապա նա պետք է սկսի Լեռնային Ղարաբաղի դեմ ադրբեջանական ագրեսիան դատապարտող երկկուսակցական ջանքերն առաջ տանելուց: Նման կարծիք է հայտնել Ամերիկյան Ձեռներեցության ինստիտուտի գիտաշխատող Մայքլ Ռուբինը  The National Interest-ում հրապարակված հոդվածում:

Վերջինս նշել է, որ էթնիկ զտումների մասին հավաստի տվյալների ֆոնին՝ ԱՄՆ Կոնգրեսը ժամանակին օրենք (Freedom Support Act, հոդված 907) է ընդունել, որի համաձայն՝ «ԱՄՆ-ն կարող է օգնություն չտրամադրել Ադրբեջանի կառավարությանը, քանի դեռ նախագահը որոշում չի կայացրել և չի հաստատել Կոնգրեսում, որ Ադրբեջանը քայլեր է ձեռնարկում Հայաստանի և Լեռնային Ղարաբաղի դեմ բոլոր տեսակի շրջափակումները և ուժի կիրառումը վերացնելու ուղղությամբ»:

«Ներկայիս ադրբեջանական հարձակումը խախտում է 907-րդ հոդվածի բոլոր պայմանները: Ադրբեջանն այժմ գործում է թրքամետ սիրիացի վարձկանների հետ, որոնցից շատերը նախապես ծառայել են «Ալ-Քաիդայի» կամ «Իսլամական պետության» հետ առնչություն ունեցող խմբավորումներում: Ագրեսորի՝ Ադրբեջանի ուժերը ծաղրում են իրենց սեփական սահմանի անվտանգությանն առնչվող հարցերը և տապալում են խաղաղ կարգավորմանն ուղղված ցանկացած դրսևորում»,- գրում է Ռուբինը:  

«Ադրբեջանը կեղծավորություն է դրսևորում ինչպես հակաահաբեկչական իր պարտավորությունները կատարելիս, այնպես էլ Հայաստանի հետ խաղաղության բանաձևին հետևելու հարցում:  Եթե Բայդենը հաղթի, կարող է կյանքի կոչել իր հայտարարությունները երկկուսակցական կոալիցիա հաստատելու մասին՝ վերջ դնելու համար Ադրբեջանի՝ ահաբեկչությանը մեղսակցելուն»,- եզրափակում է հոդվածագիրը:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 46 քաղաքացիական անձ, վիրավորվել է 144 քաղաքացիական անձ։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։

Արդեն երեք անգամ հայտարարվել է մարդասիրական հրադադարի մասին, սակայն ադրբեջանական զինուժը խախտել է այն։