Բոլորս լավ տեղյակ ենք՝ Սյունիքն այսօր ամբողջությամբ սահմանապահ է, մեր գրեթե բոլոր գյուղերը այսօր սահման են պահում: Այս մասին Tert.am-ի հետ զրույցում ասաց Գորիսի համայնքապետ Առուշ Առուշանյանը՝ անդրադառնալով հարցին, թե Սյունիքի անվտանգության առումով ինչ է փոխվել այսօր։

«Եթե մենք գալու ենք հին, խորհրդային սահմանի վրա, ինչպես այս պրոյեկտում է ասվում, ապա Խնձորեսկը 600 մետր հեռավորության վրա է լինելու թշնամու դիրքերից, տեղեր ունենք, որ ավելի մոտ: Պարզ է, որ վտանգավոր է բնակիչների համար, բայց ամեն դեպքում մենք սյունեցի ենք և պատրաստ ենք դրան: Իհարկե, վատ է, մեր կյանքն էլ նախկինը չէ, չի էլ կարող նախկինը լինել, բայց ունենք այն ինչ ունենք, պետք է փորձենք այս իրավիճակը շտկել, շտկելն էլ ես նկատի ունեմ, որ այն, ինչը մերն էր, պետք է նորից լինի մերը և քանի կմ, որ հետ է եկել սահմանը, այդքան նորից առաջ գնանք, սա պետք է լինի յուրաքանչյուր հայի առաքելությունը»,- շեշտեց Գորիսի համայնքապետը:

Անդրադառնալով Գորիս տեղփոխված արցախահայության խնդիրներին, թե որտեղ պետք է նրանք բնակվեն, Առուշանյանը նշեց, որ պատերազմի ժամանակ ունեցել են 10 500 արցախահայություն, որոնք բնակվել ու բնակվում են Գորիսի հյուրանոցներում, քաղաքացիների ընտանիքներում:

«Հիմա մի մասը վերադարձել է Արցախ, մյուս մասը դեռ Գորիսում է: Մենք՝ որպես համայնքապետարան, ես՝ որպես հայ մարդ, ինքս պատրաստ եմ անհրաժեշտ բոլոր քայլերը ձեռնարկել նրանց համար: Արդեն հանձնարարական կա մեր քաղաքաշինության բաժնին և տվել եմ 10 օրվա ժամկետ՝ Գորիսում համայնքային սեփականություն հանդիսացող մի քանի կիսակառույց շենքերում բնակարանները վերանորոգվեն, որ մեր արցախահայությունը բնակվի այստեղ: Սա գուցե որոշակի ժամանակ կպահանջի, իսկ մինչ այդ էլ մենք՝ գորիսեցիներս, պատրաստակամ ենք աջակցել նրանց այնպես, ինչպես արել ենք մինչ օրս՝ թե՛ սննդի, թե՛ հագուստի, թե՛ օթևանի հարցերով: Հետագայում քայլեր կձեռնարկենք նրանց աշխատանքով ապահովելու համար»,- շեշտեց նա:

Առուշ Առուշանյանը նշեց, որ այն տարածքները, որ իրավիճակից ելնելով տրվել են թշնամուն, պետք է ամեն ինչ արվի, որ դրանց բնակիչները չարտագաղթեն երկրից: Նրա խոսքով՝ հենց կոնկրետ իրենց նախաձեռնությամբ քայլեր են ձեռնարկվում, որպեսզի տներից զրկված արցախցիները Գորիսում բնակվեն ոչ թե ժամանակավոր կացարաններում, այլ մշտական: «Թող աստծո կամոք կարողանան վերադառնալ իրենց տները, ես վստահ եմ, որ կգա այդ օրը, բայց նրանց սեփականության իրավունքով Գորիսում էլ կտանք տներ, թող իմանան, Գորիսում էլ ունեն տուն»,- հայտարարեց Առուշանյանը:

Ի պատասխան հարցի, թե կա՞ն Արցախ վերադարձողներ, նա ասաց, որ այն հատվածներում, որոնք այս պահի դրությամբ թշնամու ձեռքում չեն, որտեղ մարդկանց տները մնում են, հետ են գնացել, բայց որտեղ մարդիկ չունեն բնակարան, դեռ Գորիսում են:

Ինչ վերաբերում է նրան, թե համայնքի բյուջեից որքան գումար է ծախսվել  արցախահայության համար, նա նշեց, որ մինչև օրս ոչ մի դրամ համայնքի բյուջեից չի ծախսվել: «Ֆինանսական օգնությունը ցուցաբերել են տեղի և արտասահմանցի բարերարները, այսօր էլ նրանց օգնությունը շարունակվում է և կշարունակվի: Այժմ քննարկում ենք և գուցե Ամանորի միջոցառումների համար նախատեսված գումարը տրամադրենք այլ կարիքների համար: Ամանոր չենք նշելու, այսքան զոհերից ու կորուստներից հետո, ի՞նչ Ամանոր: Ես անձամբ էլ չեմ նշելու և Ամանորի գիշերն էլ լինելու եմ մեր տղաների կողքին և այդ փոքրիկ գումարը, որ ծախսվում էր հարդարանքի վրա, կտրամaդրվի սահմանի վրա մի խնդիր լուծելուն»,- պարզաբանեց համայնքապետը:

Դիտարկմանը՝ նա անձամբ է դիրքերում եղել, հետո էլ գորիսեցիներին կոչ է արել, որ միանան, կամավորագրեն և հարցին՝ շա՞տ են եղել կամավորագրվողներ, Առուշ Առուշանյանը պատասխանեց. «Այո եղել են և ոչ միայն Գորիսից, մայրաքաղաքից էլ Հայաստանի տարբեր շրջաններից եկել են մարդիկ: Կոչս նրա մասին էր, որ հիմա որոշակիորեն դիրքերը փոխվել են, ավելի երկար են, քան նախկինում են եղել, և պետք է մեր այդ հողը պահենք: Խնդիրն այն չէր, որ սահման պահող չկար, ուղղակի մարդիկ կային, որ պատերազմի առաջին օրվանից պատերազմում էին և շատ քիչ էին եղել տանը և հերթափոխ իրականացնելու խնդիր ունեինք»:

Նա նշեց, որ հիմա էլ պատրաստ են մինչև վերջ կռվել: «Մեր երկրում կա՞ մի նամուս-թասիբով մարդ, որ պատրաստ չէ դրան, ինչի՞ մասին է խոսքը: Ես չեմ կարծում, որ մի նորմալ ադեկվատ հայ կարողանում է հանգիստ քնել ստեղծված իրավիճակում. ունենք այսքան զոհեր, մեր եկեղեցիներն են մնացել թշնամու մոտ, մեր պատմական հողերն այսօր թշնամու մոտ են, մենք պետք է հետ վերցնենք: Այն ինչ մերն է, պետք է լինի մերը: Սա միայն սյունեցիների, գորիսեցիների կարծիքը չէ, առիթ եմ ունեցել շփվելու Հայաստանի տարբեր հատվածների մարդկանց հետ, բոլորն այդ կարծիքին են»,- ընդգծեց Գորիսի համայնքապետը:

Առուշ Առուշանյանը նշեց, որ ամեն դեպքում իրենք շարունակելու են ապրել Գորիսում: «Մենք այստեղ ապրելու ենք, մենք մեր գյուղերը չենք թողնելու, խուճապային տրամադրություն չունենք,  առաջարկում եմ այդ բառը մեր լեքսիկոնից հանել: Մենք խուճապ չենք տարածում, իրականությունից ենք խոսում, պետք լինի՝ այս րոպեին էլ պատրաստ ենք պատերազմի: Մեր քաղաքացիների մոտ որևիցե խուճապ չկա, բայց սա խնդիր է, լուրջ խնդիր է: Այն սահմաններում, որ մնացել ենք, վատթարագույն տարբերակն է, պետք է կարողանանք այդքանը պահել, որովհետև եթե հետ գանք էլի, ընդհանրապես ավելի մեծ խնդիր կլինի»,- ասաց նա և հավելեց, որ իհարկե, այդ խնդիրը ամեն օր իր մաշկի վրա զգալու է սյունեցին, այսօր էլ զգում է:

Համայնքապետի խոսքով՝ հիմա ամենամեծ խնդիրն այն է, որ գորիսեցիների մեծ մասը գյուղատնտեսությամբ էր զբաղվում: «Այսօր դա խնդիր է, որտե՞ղ պետք է մարդիկ իրենց անասուններին պահեն, մենք այդ ռեսուրսը չունենք: Խոսում են՝ այս փակագիծը չբացենք, այն չանենք, չխոսենք, լավ, չբացենք էդ դեպքում բերեք վճարեք, թող ապրեն մարդիկ: Ինչպե՞ս պետք է մեր հասարակությունը, որ զբաղվել է գյուղատնտեսությամբ, ապրի: Հենց այսօր մարդիկ խնդիր ունեն ապրելու, վայրկյան շուտ պետք է հարցին լուծում տրվի, իսկ ես մինչև այս րոպեն չեմ տեսել այդ հարցի պատասխանը, թե ինչ է լինելու հետագայում»,- ասաց նա:

Հարցին՝ այսքանից հետո կառավարությունը չի՞ օգնում գյուղացիներին, նա րաձագանքեց. «Եթե հող չունենք, ի՞նչ օգնություն: Պետք է մտածել նոր մեխանիզմներ, նոր ներդրումներ, որ մարդկանց կարողանանք աշխատատեղով ապահովել»: