Ստեղծված իրավիճակը՝ արտահայտված առաջին անհրաժեշտության ապրանքների գների բարձրացման տեսքով, վկայում է երկրում պարենային անվտանգության բավականին թույլ ապահովման մասին: Այս մասին Tert.am-ի հետ զրույցում ասաց «Մեկ Հայաստան» կուսակցության քաղխորհրդի անդամ Վահե Դավթյանը։

Նա նշեց՝ վերջին օրերին հացը թանկացել է 10-20 դրամով, 20-30 դրամով թանկացել է հավկիթը, ձեթի գինը գերազանցել է 880 դրամը՝ չնայած ընդամենը մեկ ամիս առաջ արժեր մոտ 550 դրամ, շաքարավազի գինը հասել է 400 դրամի, ընդ որում՝ պատերազմից առաջ արժեր 300 դրամ:

«Սրան գումարենք նաև բենզինի գնի բարձրացումը՝ պայմանավորված թե՛ համաշխարհային շուկայում նավթի գների կայունացմամբ, թե՛ ներհայաստանյան շուկայում մրցակցության բացակայությամբ: Ահազանգում են նաև ԱԳԼՃԿ-ներում գազի գնի բարձրացման մասին, ինչը ևս չի կարող չանդրադառնալ շուկայի ընդհանուր կայունության վրա»,- հավելեց նա՝ ընդգծելով, որ գնաճի պատճառները մի քանիսն են:

«Դա և՛ կորոնավիրուսի պատճառով տնտեսական ակտիվության անկումն է, և՛ հետպատերազմյան շոկը, որից դեռ երկար ժամանակ չենք կարողանալու ուշքի գալ: Միայն պարետի որոշման համաձայն՝ սեպտեմբեր ամսվա դրությամբ Հայաստանում կայացվել է 5200 կազմակերպության գործունեության դադարեցման որոշում»,-ասաց նա:

Ըստ Դավթյանի՝ պետք է հասկանալ, որ պարենային անվտանգությունը ենթադրում է սննդի ոչ միայն ֆիզիկական, այլ նաև տնտեսական հասանելիությունը:

«Եթե առաջինի դեպքում մենք առայժմ չունենք մեծ խնդիրներ, ապա տնտեսական հասանելիության հարցում մենք գնալով նորանոր խնդիրներ ենք արձանագրում: Երկրում խորացող տնտեսական ճգնաժամն ու, որպես հետևանք, սոցիալական աղետը առավել ցայտուն կերպով արտահայտվելու են 2021-ին մի պարզ պատճառով. ներկայիս իշխանությունները ո՛չ ունակ են, ո՛չ էլ ցանկություն ունեն Կառավարության օրակարգ բերել երկրի պարենային անվտանգության հարցը՝ ուղղված առնվազն կարճաժամկետ կտրվածքով հարցի կարգավորմանը»,- ասաց նա՝ նշելով, թե դրա հետ մեկտեղ երկրում իրականացվող ֆինանսավարկային քաղաքականությունն իր տրամաբանությամբ փակուղային է:

«Այլևս հնարավոր չէ արհեստականորեն զսպել դրամի արժեզրկումը, դրա համար ռեսուրսները խիստ սահմանափակ են: Եթե դևալվացիան շարունակվի ևս 2-3 ամիս, ապա մտնելու ենք չափազանց վտանգավոր մի փուլ, որի տրամաբանական արդյունքը լինելու է մասսայական արտագաղթը, որն առանց այդ էլ արդեն բավական վտանգավոր ցուցանիշներ է գրանցում: Բավական է նշել, որ 2020 թ. հունվարի 1-ի դրությամբ արձանագրվել է նորանկախ Հայաստանի բնակչության ամենացածր թիվը՝ 2 մլն 959 հազար»,-ընդգծեց Դավթյանը:

Նրա խոսքով՝ այս համատեքստում իշխանությունը զավթած խմբակի կողմից արվող հայտարարություններն այն մասին, որ Հայաստանը պետք է գնա Թուրքիայի ու Ադրբեջանի հետ տնտեսական ինտեգրման ճանապարհով, չափազանց վտանգավոր են:

«Պարզ է, որ առանց այդ էլ թույլ ու անմրցունակ հայկական շուկան պատրաստ չէ դիմակայել թուրք-ադրբեջանական ագրեսիվ առևտրատնտեսական քաղաքականությանը, հետևաբար, թուրք-ադրբեջանական ուղղությամբ մեր տնտեսական ինտեգրումը բերելու է հայաստանյան ազգային տնտեսության վերջնական ջախջախմանը: Ի դեպ, ամռանը հաստատված Հայաստանի ազգային անվտանգության ռազմավարության մեջ չափազանց մակերեսային մոտեցում է առկա պարենային ու տնտեսական անվտանգության հարցերին»,-ասաց նա:

Ըստ Դավթյանի՝ ակնհայտ է կառավարման մշակույթի, պլանավորման ճգնաժամը, որն այսօրվա իշխանություններն օրգանապես ի վիճակի չեն հաղթահարել՝ լինելով ոչ թե տեխնոկրատ, այլ պոպուլիստ:

«Ակնհայտ է նաև, որ սա բերելու է երկրում աղքատության խորացմանը, որն այսօր պաշտոնական թվերի համաձայն 23-24 տոկոս է, սակայն բազմաչափ աղքատության ցուցանիշներով Հայաստանի բնակչության մոտ 50%-ն ունի սոցիալական անվտանգության խնդիր: Մենք տեսնում ենք, որ այս խնդիրներն ի սկզբանե չեն եղել թավշյա-հեղափոխականների օրակարգում, այսօր էլ այլևս ուշ է խոսել նրանց կողմից որևէ օրակարգի ձևավորման մասին, որը պահանջում է մասնագիտական ռեսուրս: Կարծում եմ՝ հաջորդ իշխանություններն առաջին հերթին պետք է հաստատեն Հայաստանում պարենային անվտանգության ռիսկերի չեզոքացման ռազմավարություն, սակայն մինչ այդ փորձեն վերակենդանացնել պետական կառավարման համակարգը, որն այլևս չի գործում»,-ասաց Վահե Դավթյանը: