Թուրքիան և Ադրբեջանը հերքում են Լեռնային Ղարաբաղի տարածաշրջանում սիրիացի վարձկանների կռվելու փաստը, սակայն նրանցից 4-ը BBC News-ի հետ զրույցում հայտնել են, որ իրենց սկզբնապես հավաքագրել են Ադրբեջանում պահակային ծառայության մասնակցելու համար, սակայն անսպասելիորեն ուղարկել են ռազմաճակատի առաջնագիծ:

Սիրիացիներից մեկի խոսքով՝ Ադրբեջանում առաջարկվող «աշխատանքի» մասին երկրի հյուսիսային շրջաններում լուրեր տարածվել սկսել են այս տարվա օգոստոսին:

«Ընկերներիցս մեկն ինձ ասաց, որ շատ լավ աշխատանք կա, որ կարելի է անել, պետք է պարզապես լինել Ադրբեջանի ռազմական անցակետերում»,- պատմել է վարձկաններից մեկը:

Մեկ այլ վարձկանի խոսքով՝ իրենց աշխատանք են առաջարկել որպես սահմանային խաղաղապահներ, որի համար իրենց ամսական 2000 դոլար էին առաջարկում:   

Սակայն իրականում աշխատանքն այն չէր, ինչ իրենք մտածում էին: «Ես ողջ մնալու հույս չունեի, մահը մեր շուրջբոլորն էր»,- ասել է պարբերականի զրուցակիցը:

«Ամենածանր պահն այն ժամանակ էր, երբ զինակից ընկերներիցս մեկը հարվածի տակ ընկավ: Դա տեղի ունեցավ ինձանից 20 մետր հեռավորությամբ, որտեղ ընկել էր արկը: Ես տեսա նրան ընկնելիս: Նա ինձ էր ձայն տալիս, բղավում էր: Սակայն նրա տեղը գտնվում էր հայկական թնդանոթների տեսադաշտում, ես չէի կարող օգնել նրան: Նա պարզապես այնտեղ էլ մահացավ»,- պատմել է Իսմայիլ անունով վարձկանը, որը հետագայում նույնպես հոսպիտալացվել էր բեկորային վնասվածքով:

Հիշեցնենք, որ Նիկոլ Փաշինյանը նոյեմբերի 10-ին ստորագրել է եռակողմ հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը, բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։

Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա: