Վրաստանի տարածքով դեպի ԵՄ սկսվել է ադրբեջանական գազի մատակարարումը եվրոպական շուկա: Պատմության մեջ առաջին անգամ Ադրբեջանին հաջողվել է գազատարների միջոցով իր բնական գազը արտահանել եվրոպական շուկա: Հարավային գազային միջանցքը կապահովի Ադրբեջանի «Շահ Դենիզ» հանքավայրից բնական գազի մատակարարումը Թուրքիա և ԵՄ երկրներ՝ Վրաստանի, Թուրքիայի, Հունաստանի և Ալբանիայի տարածքներով: Այն կսպասարկի ԵՄ 10 խոշոր գնորդներին և Թուրքիային:

«Վրաստանը դարձել է էներգետիկ շուկայում միջազգային դերակատար»,-փաստին արձագանքել է Վրաստանի  վարչապետ Գեորգի Գախարիան՝ գոհունակությամբ նշելով, որ Վրաստանը, մասնակցելով գործընթացին՝ որպես տարանցիկ երկիր, դարձել է էներգետիկ շուկայում միջազգային դերակատար:

«Վրաստանը գործող միջպետական համաձայնագրերի և ընդունող երկրի համաձայնագրի, ինչպես նաև առքուվաճառքի պայմանագրերի համաձայն, Հարավկովկասյան գազատարի նախագծից գազ կստանա շուկայականից շատ ցածր՝ մոտ 2 անգամ իջեցված գներով: Ընտրովի գազի պայմանագիրը թույլ է տալիս տարեկան ստանալ գազի ծավալի մինչև 5%: Այս պայմանագիրն ուժի մեջ է մինչև 2066 թվականը, իսկ լրացուցիչ գազի պայմանագիրը՝ մինչև 2026 թվականը, երբ Վրաստանն այս պայմանագրով տարեկան կստանա մինչև 500 միլիոն խորանարդ մետր գազ», – ասել է Գախարիան:

Վարչապետը խոսել է նաև նախագծի քաղաքական կարևորության մասին.

«Եթե մինչ այժմ Վրաստանը միայն տարածաշրջանային նշանակություն ունեցող տարանցիկ երկիր էր, իրականացնում էր ադրբեջանական գազի տարանցումը դեպի Թուրքիա, ռուսական գազի տարանցումը Հայաստան, ապա այժմ դարձել է միջազգային դերակատար: Այսուհետ երկրով անցնող գազը կարևոր դեր կխաղա միջազգային էներգետիկ շուկաների, հիմնականում ԵՄ տարածքում դիվերսիֆիկացման և մատակարարումների անվտանգության բարձրացման գործում», – ասել է նա:

Հարավային գազային միջանցքը բաղկացած է երեք խողովակաշարերից՝ Հարավկովկասյան գազատար (SCPX), Անդրանատոլիական գազատար (TANAP) և Անդրադրիատիկ գազատար (TAP):