Լեռնային Ղարաբաղում ռազմական գործողությունների վերջին բռնկման ֆոնին ԱՄՆ վարչակազմը կվերանայի անվտանգության ոլորտում Ադրբեջանին տրվող օգնությունը: Այս մասին հայտարարել է ԱՄՆ պետքարտուղարի թեկնածու Էնթոնի Բլինքենն՝ ի պատասխան ԱՄՆ սենատի արտաքին հարաբերությունների հանձնաժողովի ղեկավար Բոբ Մենենդեսի գրավոր հարցերին: Այդ մասին հայտնում է Ամերիկայի հայ դատի հանձնախումբը:

«Ես աջակցում եմ անվտանգության, ժողովրդավարության ամրապնդման և տնտեսական աճի խթանման հարցում Հայաստանին օգնություն տրամադրելուն: Դա կօգնի ամրապնդել Հայաստանի անվտանգությունը և կայունությունը: Լեռնային Ղարաբաղում ռազմական գործողությունների վերջին բռնկման ֆոնին մեր վարչակազմը կվերանայի անվտանգության ոլորտում Ադրբեջանին տրվող օգնությունը: Ես ակնկալում եմ աշխատել Կոնգրեսի և պաշտպանության նախարարի հետ որոշակիացնելու համապատասխան օգնության ծավալը Հայաստանի և տարածաշրջանի անվտանգության կարիքների բավարարման համար»,- ասել է Էնթոնի Բլինքենը՝ պատասխանելով Սենատի արտաքին հարաբերությունների հանձնաժողովի նախագահ Բոբ Մենենդեսին:

Բլինքենը նաև նշել է, որ  անհրաժեշտության դեպքում փոփոխություններ կարվեն՝ կապված ԱՄՆ Ազատության աջակցման ակտի 907 բանաձևի հետ:

«Լեռնային Ղարաբաղում ռազմական վերջին գործողություններից հետո Բայդեն- Հարիս վարչակազմը կվերանայի Ադրբեջանին տրվող աջակցությունն անվտանգության ոլորտում: Եթե հանգամանքները պահանջեն, ապա Բայդեն- Հարիս վարչակազմը պատրաստ կլինի կասեցնել Ազատության աջակցման ակտի 907 բաժնով նախատեսված պահանջների կատարման արգելքը»,- նշել է Բլինքենը:

Պետքարտուղարի թեկնածուն նաև նշել է, որ ԱՄՆ-ը կակտիվացնի իր ներգրավվածությունը Մինսկի խմբում՝ Ղարաբաղյան հակամարտության տևական լուծում գտնելու համար:

«Նախագահն ասել է, որ ԱՄՆ-ն պետք է գլխավորի հակամարտության ամուր կարգավորման դիվանագիտական ջանքերը՝ աշխատելով մեր եվրոպացի գործընկերների հետ և պետք է հասնի միջազգային մարդասիրական օգնության տրամադրման՝ տառապանքներին վերջ դնելու համար: Ես կակտիվացնեմ ԱՄՆ-ի մասնակցությունը Լեռնային Ղարաբաղի հակամարտության վերջնական կարգավորման որոնման հարցում, որը պաշտպանի Լեռնային Ղարաբաղի անվտանգությունը և օգնի՝ կանխելու նոր պատերազմը: Սա ներառում է նաև մեր փոխգործակցության ակտիվացումը Մինսկի խմբում»,- նշել է պետքարտուղարի թեկնածուն:

Էնթոնի Բլինքենն աջակցություն է հայտնել Արցախում ականազերծման ծրագրի ֆինանսավորմանն ու ընդհանրապես հումանիտար օգնության տրամադրմանը: