«Մեր խնդիրը կացարան ունենալն է: Մինչև ե՞րբ մենք էստեղ վարձով ապրենք, կամ թափառականի պես՝ սրա-նրա տանը օր անցկացնենք, ոչ ոքի համար պարզ չի: Բարեկամների տանը մի սենյակում 11-12 հոգով ապրելը հարցի լուծում չի»,- Կառավարության շենքի մոտ բողոքում են Քաշաթաղից տեղահանված բնակիչները՝ պահանջելով գույքի փոխհատուցում:

Նրանք նշում են, որ աջակցության ծրագրերից ոչ բոլորից է հաջողվում օգտվել: «Մինչ օրս պարզ չի՝ քանիսն են շահառու հանդիսանում: Ոչ ոք հետամուտ չի, թե 83 հազար դրամ աջակցությունից մարդկանց քանի՞ տոկոսն է օգտվել: Ամեն մեկին տարբեր պատճառներով մերժում են: Էն, որ բարձրաձայնում են, թե կա ծրագիր, որից կարող են օգտվել բոլոր արցախցիները, բոլորովին այդպես չէ»,- ասացին ակցիայի մասնակիցները:

Հարցին՝ փորձե՞լ են հանդիպել Արցախի սոցիալական և միգրացիայի հարցերով նախարար Մանե Թանդիլյանի հետ, արցախցիները տեղեկացրին, որ հանդիպել են, սակայն Թանդիլյանը պատասխանել է՝ աջակցություն կտրամադրեն այն դեպքում, եթե նրանք վերդառանան Արցախ, իսկ եթե չեն ցանկանում վերադառնալ՝ ապա ստիպված են դիմել ՀՀ կառավարությանը:

Հարցին՝ իսկ թե ինչո՞ւ վերջինները չեն ցանկանում վերադառնալ, քաշաթաղցիներն ասացին. «Քանի դեռ Արցախի վիճակն անորոշ է՝ մարդիկ իրենց անապահով են զգում, ուստի չեն ցանկանում վերադառնալ»:

Նրանք նշեցին, որ մի քանի անգամ գրավոր խնդրել են վարչապետին՝ պատվիրակություն ընդունի, լսի իրենց խնդիրները, որպեսզի ակցիաներ չիրականացնեն, սակայն մինչ օրս վարչապետն իրենց չի ընդունել: