ՀՀ ՄԻՊ Արման Թաթոյանն այսօր հայտարարություն էր տարածել, որտեղ խոսվում էր Կապանի համայնքի մի շարք գյուղերի միջհամայնքային ճանապարհներին ադրբեջանական դրոշների ու նոր ցուցանակի տեղադրման մասին։ Մասնավորապես ասվում էր, որ Ճակատեն, Շիկահող, Սրաշեն, Ծավ, Ներքին Հանդ գյուղերի բնակիչներից Մարդու իրավունքների պաշտպանն ահազանգեր է ստացել այդ ցուցանակի հետ կապված։ Բնակիչները դա համարում են ադրբեջանցիների կողմից կոնկրետ գործողություններ՝ իրենց իրավունքների ոտնահարմանը, ահաբեկմանն ուղված կոնկրետ քայլեր։ Այդ ամենն ուղեկցվում է ամենօրյա կրակոցներով։

ArmDaily.am-ի հետ զրույցում Կապան խոշորացված համայնքի համայնքապետ Գևորգ Փարսյանը տեղեկացրեց, որ մանրամասն քննարկել է ՄԻՊ Արման Թաթոյանի հետ այս իրավիճակը։

«Կառավարությունից որևէ մեկն ինձ հետ կապ չի հաստատել, որ այդ հարցի հետ կապված հետաքրքրություն ցուցաբերի կամ անհանգստություն հայտնի, քննարկում չենք ունեցել որևիցե գերատեսչության կամ անձի հետ»,-ասաց Գևորգ Փարսյանը։

Նա մանրամասնեց, որ Կապանի համայնքապետարանը համագործակցում է Պաշտպանության նախարարության և Ազգային Անվտանգության հետ։

«Որպեսզի թյուր կարծիք չստեղծվի կամ սխալ մեկնաբանում չլինի, ասեմ, որ այդ բոլոր հարցերի քննարկումները եղել են միայն ԱԱԾ-ի հետ։ Եթե ինչ-որ անհանգստություն, մտահոգություն այդ հարցերի վերաբերյալ որ տեսել եմ՝ տեսել եմ միայն ԱԱԾ-ից և Սահմանապահ զորքերից»,-տեղեկացրեց Կապանի քաղաքապետը։

Նա պատմեց նաև ադրբեջանական նոր ցուցանակի տեղադրման հետ կապված մանրամասներ. «Ցուցանակը տեղադրվել է հունվարի 22-ին, բայց մինչ այդ են սրիկաները՝ ադրբեջանցիները, ցանկացել տեղադրել ցուցանակը, դրանից մի շաբաթ առաջ են ուզեցել տեղադրել՝ մեր սահմանապահները չեն թողել, որպեսզի դա տեղադրեն, նույնը ռուսներն են խանգարել։ Բայց մի շաբաթ անցնելուց հետո, իմ իմացած տեղեկություններով, անձամբ դրանց սահմանապահ զորքերի հրամանատար Գուլիևն է եկել ու կարգադրել, որ այդ ցուցանակը տեղադրի»,-հայտնեց Փարսյանը։

Մեր ճշտող հարցին, թե ինչու են ադրբեջանցիներն այս անգամ կարողացել տեղադրել ցուցանակը, Կապանի քաղաքապետն ասաց, որ հայ սահմանապահներն ու ռուս խաղաղապահները փորձել են խոչընդոտել, սակայն ադրբեջանցիներն ասել են, որ մեր տարածքն է, մեր հողն է՝ ինչ ուզենք՝ կանենք ու հավելել են, որ հրաման են կատարում՝ ուրիշ բան չեն կարող անել։

Մանրամասները՝ նյութի սկզբնաղբյուր կայքում.