Այսօր՝ փետրվարի 16-ին մեկնարկում է ռուս-իրանական համատեղ ծովային զորավարժությունները։ Զորավարժություններին մասնակցելու է նաեւ Չինաստանը։ Դրանք ընթանալու են հիմնականում Հնդկական օվկիանոսի հյուսիսային կողմում։ Զորավարժությունների նպատակը ռեգիոնի անվտանգության ամրապնդումն է եւ Մոսկվայի ու Թեհրանի միջեւ համագործակցության ամրացումը։

Իհարկե, առաջնահերթ խնդիրը ծովային տարածքում ուժի ցուցադրությունն է, սակայն բավական հետաքրքիր է, որ այդ զորավարժությունները տեղի են ունենում Կարսում թուրք-ադրբեջանական զորավարժություններից հետո։ Դժվար է ասել, ինչ որ ակնարկ կա այս հաջորդականության մեջ թե չէ, սակայն այն, որ ռուս-իրանական տանդեմը ռազմական ուժի ցուցադրություն է անում ծովային տարածքում թուրք-ադրբեջանական տանդեմի ցամաքում ուժի ցուցադրությունից հետո, որպիսին Կարսի զորավարժություններն են հետաքրքիր է ինքնին։

Ամեն դեպքում Իրանի զինված ուժերի բարձրաստիճան զինվորականները այդ զորավարժությունները համարում են խիստ խորհրդանշական ազդակ, ուղղված թշնամիների, այդ համատեքստում առաջին հերթին՝ Իրանի թշնամիների դեմ։ «Երբ ռուսական հզոր նավատորմը վարժանքներ է անցկացնում Իրանի ռազմածովային ուժերի եւ Իսլամական հեղափոխության պահապանների կորպուսի հետ, դա հստակ ազդակ է»,- Mehr լրատվական գործակալության փոխանցմամբ, հայտարարել է կոնտր-ադմիրալ Հաբիբոլա Սայարին։

Հիմա հարց է, թե ովքեր են թշնամիները եւ հատկապես, ովքեր են Իրանի թշնամիները, կամ ում է Իրանը համարում իրեն պոտենցիալ առումով թշնամի կամ ումից է վտանգ զգում։ Ու արդյոք պանթուրքիզմը հենց նման սպառնալիք չի պարունակում իր մեջ, որի հակազդեցությունն է նաեւ այս զորավարժությունները․ հատկապես, որ պանթուրքիզմի կողմից երեք տերություններն էլ՝ Ռուսաստան, Իրան եւ Չինաստան, թիրախավորված են։