Գաղտնիք չէ,  որ ներկայիս իշխանության ներկայացուցիչներն  ամենևին էլ հանդուրժողական չեն իրենց քննադատողների հանդեպ, և էական չէ, թե այդ քննադատությունը որքանով է օբյեկտիվ և ի շահ ժողովրդի ու հայրենիքի։

Ավելին, կան իշխանության ներկայացուցիչներ ու իշխանությանը, այսպես ասած, իշխանությանը մոտ կանգնած մարդիկ, որոնց հիմնական գործը իշխանության ընդդիմախոսներին  անտեղի վատաբանելը, նրանց մասին կեղծ ինֆորմացիաներ տարածելը և քարկոծելն է։

Վերջերս հանրության ու մամուլի ուշադրության ներքո են հայտնվել կրթության ոլորտում եղած  խնդիրները և կրթական նոր չափորոշիչների հետ կապված մեծ խնդիրները։

Թեև անվանի մասնագետները և հատկապես  բանասերներն ահազանգեր են հնչեցնում, որ կրթական այս չափորոշիչները կարող են շատ վատ ազդեցություն ունենալ կրթական ոլորտի ու, առհասարակ, երեխայի դաստիարակության գործում, բայց, այնուամենայնիվ, իշխանությունները ու ԿԳՄՍ նախարար Արայիկ Հարությունյանն անդրդվելի են։

Կրթության ոլորտում եղած  մեծ խնդիրների մասին բարձրաձայնում է նաև ԲՀԿ-ն և,  իհարկե, ԲՀԿ առաջնորդը։ Բնականաբար, իշխանությունը իր որդեգրած ստրատեգիային համաձայն՝  թիրախավորել է ԲՀԿ-ին ու  Գագիկ Ծառուկյանին։

Խոսելով վերոնշյալ թեմայի մասին ՝ Ազգային անվտանգության վարչության պետի նախկին տեղակալ Գուրգեն Եղիազարյանը MegaNews.am-ի թղթակցի հետ զրույցում նշեց՝ կրթական ոլորտում փարձում են իրականացնել այնպիսի փոփոխություններ, որոնք կարելի է անվանել այլասերում։

Եղիազարյանի խոսքով՝ այս  իշխանությունը անդադար վարկաբեկում է իրեն քննադատողներին։

«Այս իշխանությունը հասել է նրան, որ ԲՀԿ-ական պատգամավոր Գևորգ Պետրոսյանի վերաբերյալ ինչ-որ հոլովակ է պատրաստել։ 

 Այդ մարդիկ  վատաբանում են  բոլոր  նրանց, ովքեր կանգնած են ժողովրդի կողքին։ Այս իշխանությունը մոռացել  է իր խոստումների մասին ու  ստերի շարանը փաթաթել է հայ ժողովրդի գլխին։ Նրանք  անդադար վարկաբեկում ու վատաբանում են նրանց, ովքեր կոնկրոտ գործով են զբաղված», —  նշեց Գուրգեն Եղիազարյանը։

Վերջինս անդրադարձավ  նաև ստամբուլյան կոնվենցիային ու հայկական ավանդական արժեքների պահպանման  կարևորությանը։

«Ստամբուլյան կոնվենցիան ու  այդ բոլոր այլասերման փորձերն  առաջացնում են մեծ խնդիրներ, և հայ ժողովուրդը պիտի հասկանա, որ կան մարդիկ, որոնք կանգնած են իր կողքին, պաշտպանում են մեր արժեքներն ու մեր եկեղեցին։

Այդ կարևորագույն  արժեքների պաշտպաններից են նաև ԲՀԿ-ն ու մասնավորապես՝ հենց Ծառուկյանը։ Հիմա այս թիրախավորումը որ սկսվել  է ԲՀԿ-ի դեմ, լրիվ  ապարդյուն է։ Կոնկրոտ Գագիկ Ծառուկյանի անունն արատավորելու փորձերն անիմաստ են։ Այս իշխանությունները պիտի այնքան խելք ունենան, որ գոնե իրենց այս մարտավարությունը փոխեն, բայց նրանք այդ խելքն էլ չունեն», —  նշեց Գուրգեն Եղրազարյանը՝ շեշտելով՝ խիստ մտահոգ է  կրթության ոլորտում առկա խնդիրներով։

«Իմ թոռնիկները գտնվում են արտերկրում։

Եթե նրանք ՀՀ-ում լինեին, այս հիմարների պարագայում ես իմ թոռնիկներին չէի թողնի՝ դպրոց գնային։ Այսօր ունենք ազգադավ իշխանություն։ Ես ուրիշ որակում տալ չեմ կարող», —  եզրափակեց Գուրգեն Եղիազարյանը։

 

Հասմիկ Սարգսյան