«Կառավարության որոշումներից մեկով արդեն իսկ մի շարք ապրանքներ՝ մասնավորապես ջերմոցային տնտեսության ապրանքները, Կառավարության նախորդ նիստով հաստատվել են, և Կառավարությունը սուբսիդավորում է իրենց մաքսատուրքը և տրանսպորտային ծախսերի մի զգալի մասը, որի արդյունքում արդեն իսկ ունենք արտահանումներ Վրաստան, Հունաստան, Ուկրաինա, Ղազախստան և այլ երկրներ»:

Այս մասին ՀՀ ԱԺ մշտական հանձնաժողովների համատեղ նիստում ասել է ՀՀ էկոնոմիկայի նախարար Գևորգ Պապոյանը:

Նախարարի խոսքով՝ գործընթացը շարունակական է:

«Մենք ակնկալում ենք շատ ավելի մեծ ծավալներ: Ըստ էության, այստեղ սահմանափակում չկա: Ինչքան շատ արտահանեն, մենք այդ ամբողջ ծավալը կսուբսիդավորենք: Ուրախությամբ պետք է արձանագրեմ, որ ամեն հաջորդ օրը ծավալները շարունակական մեծանում են»,- նշել է Պապոյանը:

Նրա խոսքով՝ Կառավարության նիստում աջակցության ևս մեկ նախագիծ կընդունվի՝ ոչ ջերմոցային արտադրանքի արտահանման տրանսպորտային ծախսերի սուբսիդավորում:

Ըստ Պապոյանի՝ ՀՀ արտադրանքը բարձր որակի է, համապատասխանում է բոլոր ստանդարտներին, սակայն մեր միակ խնդիրն այն է, որ ունենք որոշակի հեռավորություն եվրոպական շուկաներից և տրանսպորտային ծախսերը որոշակիորեն բարձր են, ինչն ազդում է  ապրանքների մրցունակության վրա: