Դոնբասի հարցով եռակողմ կոնտակտային խմբի Ուկրաինայի պատվիրակության ղեկավարի տեղակալ Վիտոլդ Ֆոկինը նախազգուշացրել է լայնամասշտաբ բնապահպանական աղետի սպառնալիքի մասին:

Նա նշել է, որ Դոնբասում ենթակառուցվածքների ոչնչացումը հանգեցրել է նրան, որ շատ հանքեր հեղեղվել են։ Նա ընդգծել է, որ հրատապ է դրանց մաքրման աշխատանքների կազմակերպումը, քանի որ ջրերը կարող են լցվել տեղի գետերն ու լճերը, այնուհետև՝ Ազովի և Սև ծովեր:

«Շատերն աչք են փակում, սակայն սպասվող աղետը կարող է անհամեմատ մեծ լինել Չեռնոբիլի վթարից», – եզրահանգել է Ֆոկինը «Страна.ua»-ին տված հարցազրույցում:

Չեռնոբիլի ատոմակայանում վթարը տեղի էր ունեցել 1986 թվականի ապրիլի 26-ի գիշերը, պայթել էր թիվ 4 էներգաբլոկի ռեակտորը: Մեծ քանակությամբ ռադիոակտիվ նյութեր էին արտանետվել շրջակա միջավայր: Փորձագետների եզրակացությունների համաձայն` միջադեպի  պատճառը բլոկի անձնակազմի կողմից ԱԷԿ-ի շահագործման կանոնների կոպիտ խախտումներն էին: