Խուճապ Գյումրու ինֆեկցիոնում. ինչո՞ւ են կորոնավիրուսով հիվանդները տեղափոխվում մայրաքաղաք
Գյումրու ինֆեկցիոն հիվանդանոցում բուժվող կորոնավիրուսով հիվանդների հարազատները վաղ առավոտից խուճապի մեջ են: ՀԺ ահազանգած քաղաքացիներից մեկը տեղեկացրեց, որ իրենց ասվել է, թե առաջիկա մեկ ժամում բոլոր հիվանդները տեղափոխվելու են Երևան:
«Մենք դեմ ենք, մեր հիվանդին կտանին, եսիմ ի՞նչ ենեն, ինչղ ետ գան, էդ էլ հարց է՝ գուկա՞ն, թե՞ չէ: Ստեղ գոնե քաղաքի մեջն էր, կապը կար, մենք մինչև երևանները ի՞նչղ հասնինք կամ էլ որ զանգենք, ո՞վ է մեզի պատասխանողը: Խոմ զոռով տանելով չէ»,- բողոքեց քաղաքացին:
Ինչո՞ւ են կորոնավիրուսով հիվանդները տեղափոխվում Գյումրիից՝ Շիրակի մարզպետարանի առողջապահության բաժնի պետ Լեյլի Ասլանյանն ասաց՝ առողջապահության նախարարի հրամանն են իրականացնում:
«Նախարարի հրամանով՝ մարզերում բացված կորոնավիրուսային ծառայություն իրականացնող COVID կենտրոնները կփակվեն, և ծառայությունը կկենտրոնացվի միայն Երևանում: Հաշվի է առնվել թվերի նվազումն ու այն հանգամանքը, որ այլևս երևանյան հիվանդանոցները գերծանրաբեռնված չեն: Նախարարի հրամանը սեպտեմբերի 1-ով է մտնում գործողության մեջ: Դրա համար մենք այսօր ենք կազմակերպում տեղափոխումը, որ հասցնենք նաև ախտահանել ու պահանջվող այլ գործողություններ իրականացնել հիվանդանոցում, որպեսզի անցնեն սովորական, բնականոն աշխատանքի»,- տեղեկացրեց մարզպետարանի պատասխանատուն:
Գյումրու ինֆեկցիոնից Երևան կտեղափոխվի կորոնավիրուսով հիվանդ 55 մարդ: Նրանց տեղափոխումն իրականացվում է առողջապահության նախարարության և շտապօգնության ծառայության միջոցով: Այս պահին, սակայն, Լեյլի Ասլանյանը հստակ չկարողացավ նշել, թե հիվանդները մայրաքաղաքի որ հիվանդանոցներ են տեղափոխվում, ասաց՝ նախարարությունից երբ ասեն, իրենք էլ կպայմանավորվեն շտապօգնության ծառայության հետ, կիրականացնեն տեղափոխումը:
Այս պահին Երևան տեղափոխվող հիվանդների մեջ, ըստ Ասլանյանի, ծանր վիճակում գտնվող մարդ չկա, քանի որ Գյումրիում մնում էին միայն նրանք, ովքեր ռեանիմացիայի կարիք չունեին: Հիվանդության ծանր ընթացք ունեցած հիվանդներն ավելի վաղ էին տեղափոխվել մայրաքաղաք:
Ինչո՞ւ են հիվանդները խուճապի մեջ, ինչո՞ւ են հրաժարվում տեղափոխվելուց, արդյոք նախապես իրազեկվե՞լ էին, թե՞ միայն առավոտյան են այդ մասին իմացել: Պատասխանատուն ասաց՝ գիտեցել են ավելի վաղ, և այս պահին բարձրացած աղմուկն ուղղակի անհասկանալի է:
«Նրանց ամեն ինչ բացատրվել է ամենայն մանրամասնությամբ, գիտեն, թե ինչի համար են գնում Երևան: Ինչ վերաբերում է մարդկանց ռեակցիային, երևի բնական է. նրանք էլ իրավունք ունեն իրենց կարծիքն ունենալ: Մենք էլ իրականացնում ենք մեր, բայց որ անհանգստանալու որևէ հարց չկա, դա հաստատ է: Տեղափոխումն էլ, բուժումն էլ նախարարությունն է իրականացնում, կրկին անվճար, ոչ մի փոփոխություն այս հարցում չկա»,- ասաց Լեյլի Ասլանյանը:
Գյումրու ինֆեկցիոնից կորոնավիրուսով հիվանդները գնում են, սակայն պահպանվում է տրիաժի ծառայությունը: Կասկածելի հիվանդները կմնան, եթե թեստավորվելուց հետո կհաստատվի կորոնավիրուս, կրկին կտեղափոխվեն Երևան. «Նորմալ գործընթաց է, առանց խուճապի, առանց ավելորդ խնդիրների, ես չգիտեմ՝ ինչու է նման արձագանք ստացել»:
Կմնա՞ արդյոք «Գյումրի» ԲԿ-ում բացված տրիաժի ծառայությունը ևս՝ Ասլանյանն ասաց՝ այս պահին հարցին պատասխանել չի կարող, դեռ տեղյակ չէ: Դա հետագայում նախարարությունը կորոշի կմնա այն ԲԿ-ում, թե կտեղափոխվի ինֆեկցիոնի տրիաժ:
