Զոհրաբ Մնացականյանը Interfax-ի թղթակցին տված հարցազրույցում խոսել է ԼՂՀ խնդրի լուծման ուղիների, Հայաստանի և Ադրբեջանի հետ Ռուսաստանի ռազմատեխնիկական համագործակցության, ինչպես նաև Բելառուսում տեղի ունեցող իրադարձությունների մասին։
- Ռուսաստանը ռազմատեխնիկական ոլորտում ակտիվորեն համագործակցում է Հայաստանի և Ադրբեջանի հետ: Դուք դրանում որոշակի երկիմաստություն չե՞ք տեսնում՝ հաշվի առնելով հայ-ադրբեջանական հարաբերությունների վերջին սրացումը։
- Հայաստանն ու Ռուսաստանը դաշնակիցներ են, ռազմատեխնիկական համագործակցությունը դաշնակցային փոխգործակցություն է։ Այնպես որ, այստեղ որևէ հարց կամ սահմանափակում չի կարող լինել։ Ռազմատեխնիկական ոլորտում մեր փոխգործակցությունն իրականացվում է Ռուսաստանի և Հայաստանի միջև առկա համաձայնագրերի, պայմանավորվածությունների հիման վրա: Ռուսաստանը չի խախտում հավասարակշռությունը տարածաշրջանում։ Հայաստանը տարածաշրջանային անվտանգության պատասխանատու մասնակից է։ Եվ մեր ռազմատեխնիկական համագործակցությունը որևէ կերպ ուղղված չէ երրորդ երկրների դեմ։
- Իսկ ձեզ չի մտահոգում, որ ռազմատեխնիկական ոլորտում Ռուսաստանը համագործակցում է նաև Ադրբեջանի հետ:
- Հայաստանի և Ռուսաստանի ռազմատեխնիկական համագործակցությունը կառուցված է ամուր դաշնակցային հիմքերի վրա։ Ինչ վերաբերում է Ադրբեջանին, և այդ ոլորտում համագործակցությանը, նշեմ, որ Ադրբեջանն ամեն կերպ մեծացնում է իր ռազմական ներուժը՝ փորձելով համոզել սեփական բնակչությանը և միջազգային հանրությանը, որ ունի ներուժ Լեռնային Ղարաբաղի հակամարտությունը ռազմական ճանապարհով լուծելու համար: Իր ռազմական ներուժի ավելացման ադրբեջանական տրամաբանությունն ուղղված է հակամարտության ռազմական լուծմանը, ինչը վտանգ է ներկայացնում Հայաստանի և Լեռնային Ղարաբաղի անվտանգության համար:
- Համաձա՞յն եք այն կարծիքի հետ, որ Թուրքիայի ակտիվ դիրքորոշումը, Անկարայի միանշանակ աջակցությունը Բաքվին, «յուղ է լցնում կրակի վրա»։
- Միակ երկիրը, որը փորձում է ոչ թե նվազեցնել լարվածությունը, այլ ավելի մեծ անկայունություն մտցնել՝ Թուրքիան է։ Թուրքիայի կողմից ապակայունացման և ագրեսիայի քաղաքականությունն սպառնալիք է հարևան բոլոր երկրների համար։ Այդ կապակցությամբ Հայաստանը կաշխատի իր անվտանգության հետագա ամրապնդման ուղղությամբ, այդ թվում՝ գործընկերների հետ համագործակցության ճանապարհով։