«Համատեղենք մեր ջանքերը հանուն բարեկեցիկ ապագայի». Աննա Հակոբյանը լուսանկարներ է հրապարակել
ՀՀ վարչապետի տիկին Աննա Հակոբյանը ֆեյսբուքյան էջում լուսանկարներ է հրապարակել՝ կից գրելով.
«Արմավիրի մարզի Տանձուտ համայնքի միջնակարգ դպրոցի մարզադահլիճը, հանդերձարաններն ու սանհանգույցներն են:
Առաջին երեք լուսանկարներն արվել են այս տարվա մայիսի 27-ին: Այդ օրը մեկնարկեց «Իմ քայլը» հիմնադրամի «Հանրակրթական դպրոցներում առողջ ապրելակերպի խթանում» ծրագիրը, որի շրջանակում նախատեսվում էր պիլոտային ծրագրով վերանորոգել Տանձուտ և Այգեշատ համայնքների դպրոցների մարզադահլիճները, հանդերձարաններն ու սանհանգույցները:
Վերջին երեք լուսանկարներն արվել են այսօր նույն վայրում:
Երեք ամսվա ընթացքում «Իմ քայլը» հիմնադրամի նախաձեռնությամբ և գործընկեր կազմակերպությունների աջակցությամբ ամբողջությամբ վերանորոգվել և կահավորվել են երկու համայնքների միջնակարգ դպրոցների մարզադահլիճները, հանդերձարանները, սանհանգույցները:
Վստահ եմ, որ սա Գիտելիքի օրվա առթիվ ամենալավ նվերն է երկու համայնքի 470 աշակերտներին և 53 ուսուցիչներին:
Համատեղենք մեր ջանքերը հանուն բարեկեցիկ ապագայի»:
