«Դեմոկրատական այլընտրանք» կուսակցության քաղաքական խորհրդի նախագահ, քաղաքագետ Սուրեն Սուրենյանցն այսօր լրագրողների հետ հանդիպման ընթացքում  նշեց` Հայաստանում համավարակի դեմ պայքարը ձախողվել է,  իսկ Արսեն Թորոսյանը համավարակի դեմ արդյունավետ  պայքար մղելու փոխարեն`  վրացիների դեմ հիմար հարձակումներ կատարեց, որը կարող է  բացասական իմաստով նստվածք տալ հայ-վրացական հարաբերությունների վրա:

«Արսեն Թորոսյանն անգամ առողջապահությունից չի հասկանում,  էլ ուր  մնաց` հայ-վրացական հարաբերություններից»,-    ասաց Սուրենյանցը:

Նա նշեց`   այս իշխանությունը անդադար տորպեդահարում է ընդդիմադիրներին, այդ թվում`  առողջ քննադատություն հնչեցնողներին, իսկ վերջին շրջանում հատկապես ԲՀԿ-ին ու  Ծառուկյանին:

MegaNews.am- ի հարցին` արդյոք  ԲՀԿ-ին կարող  են որոշակիորեն ճնշել իշխանության թիրախավորումը կամ կոնկրետ անձանց, օրկնակ` Ստյոպա Սաֆարյանի  պարբերաբար հնչող քնադատությունները, բանախոսը պատասպանեց.  «Ստյոպա Սաֆարյանն ինձ համար հեղինակություն չէ, մարդիկ գիտեն` նա ինչ պրոյեկտների մեջ  է:  Իսկ ԲՀԿ- ին ու Ծառուկյանին իշխանության կազմակերպած  թիրախավորումները չեն կարող վախեցնել: 

Ես վաղուց եմ ճանաչում Ծառուկյանին, նա ընկրկող մարդ չէ:Եվ հետո` նա կապ չունի նախկին համակարգի գործիչների հետ: Նա նաև այս իշխանությանն  է  հակադրվում:

 Կարծում եմ`  որակապես նոր ընդդիմություն է ձևավորվում  հիմա  ու այս ընդդիմության մեջ ԲՀԿ-ն առանցքային կարևորություն ունի»,-  ասաց  բանախոսը:

Սուրենյանցը  հավելեց` արտակարգ դրությունից հետո կարող են բողոքի ակցիաներ լինել ու այս առումով հասարակության հույսը ուղղված է  Ծառուկյանի կողմը, այսինքն` քաղաքացիները նոր փոփոխություների ակնկալիք ունենալով`  կարող են  Ծառուկյանի շուրջը համախմբվել:

Հասմիկ Սարգսյան