Ամերիկյան վարչակազմը սեպտեմբերի 2-ին  պատժամիջոցներ է սահմանել Միջազգային քրեական դատարանի դատախազ Ֆաթու Բենսուդայի նկատմամբ, ով հետաքննում է ամերիկացի զինվորականների հանցագործություններն Աֆղանստանում։ Այս մասին հայտնում է «Европейская правда» պարբերականը։

Պատժամիջոցները նախատեսում են ԱՄՆ տարածքում ակտիվների սառեցում և ԱՄՆ մուտքի արգելք։

ԱՄՆ իշխանությունները պատժամիջոցային ցուցակում են ներառել նաև Միջազգային քրեական դատարանի Իրավասության, փոխլրացման և համագործակցության բաժնի պետ Ֆակիսո Մոչոչոկոյին։

Ընդունած որոշումը մեկնաբանելով՝ ԱՄՆ պետքարտուղար Մայք Պոմպեոն ասել է, որ հերթական քայլն են անում, քանի որ դատարանը շարունակում է թիրախավորել ամերիկացիներին։

Նա ընդգծել է, որ ֆիզիկական և իրավաբանական անձինք, ովքեր կշարունակեն նյութական աջակցություն ցուցաբերել վերոնշյալ երկու անձանց, նույնպես կենթարկվեն պատժամիջոցների տակ հայտնվելու ռիսկին։

Պոմպեոն ասել է նաև, որ Պետդեպարտամենտը սահմանափակել է ԱՄՆ մուտքն այն անձանց համար, ովքեր ներգրավված են եղել ամերիկյան զորակազմի գործողությունների հետաքննման ջանքերում։ Պոմպեոն անուններ չի նշել։