ԵՄ-ի հետ Մեծ Բրիտանիայի առևտրային գործարքը պետք է կնքվի մինչև հոկտեմբերի 15-ը կամ այն ընդհանրապես չի լինի: Այս մասին հայտարարել է երկրի վարչապետ Բորիս Ջոնսոնը:

«Եթե մենք չկարողանանք պայմանավորվել այդ ժամանակահատվածում, ապա ես չեմ կարծում, որ մեր միջև կլինի ազատ առևտրի համաձայնագիր, և մենք պետք է ընդունենք դա և առաջ շարժվենք», – ասել է Մեծ Բրիտանիայի վարչապետը:

Նրա խոսքով ՝ եթե գործարքը չհամաձայնեցվի, Մեծ Բրիտանիան ԵՄ-ի հետ առևտրային այնպիսի հարաբերություններ կունենա, որոնք նման կլինեն Եվրամիության և Ավստրալիայի հարաբերություններին: Ու դա լավ արդյունք կլինի:

«Մենք լիակատար վերահսկողություն կունենանք մեր օրենքների, մեր կանոնների և մեր ձկնորսական ջրերի նկատմամբ», – նշել է նա:

Ջոնսոնը նաև հավելել է, որ Մեծ Բրիտանիան պատրաստ է ԵՄ-ի հետ խելամիտ համաձայնության գալ գործնական հարցերի շուրջ, այդ թվում ՝ չվերթների, բեռնափոխադրումների կամ գիտական ոլորտում համագործակցության, նույնիսկ եթե առևտրային գործարք ձեռք չբերվի:

«Մեր դռները երբեք չեն փակվի, և մենք կունենանք առևտուր՝  որպես ընկերներ և գործընկերներ, բայց առանց ազատ առևտրի մասին համաձայնագրի», – պարզաբանել է նա։