Վրաստանի նախկին նախագահ Միխեիլ Սաակաշվիլին հայտարարել է, որ խորհրդարանական ընտրություններում իր «Միասնական ազգային շարժում» կուսակցության հաղթանակի դեպքում ինքը կդառնա երկրի վարչապետ։ Այս մասին ընդդիմադիրը հայտնել է իր ֆեյսբուքյան էջում։

«Համաձայն եմ լինել անցումնային վարչապետ՝ ոչ լիարժեք ժամկետով, այլ կայունացման ժամանակահատվածով (2 տարի-խմբ․), քանի դեռ չի հաջողվել հաղթահարել խորը ճգնաժամը, որում այժմ գտնվում է Վրաստանը»,-ընդգծել է քաղաքական գործիչը։

Սաակաշվիլին միևնույն ժամանակ նշել է, որ շարունակում է աշխատել սովորական ռեժիմով՝ որպես Ուկրաինայի նախագահին կից Բարեփոխումների գործադիր կոմիտեի ղեկավար։

«Ինձ համար Ուկրաինայի և Վրաստանի ճակատագրերն անբաժան են։Ես ընտրություն չեմ կատարում երկու երկրների միջև։ Իմ պայքարը շարունակվում է և՛ այնտեղ, և՛ այնտեղ»,-ասել է նա։

Նա տեսաուղերձով ներողություն է խնդրել վրացի ժողովրդից իր նախագահության տարիներին թույլ տված սխալների համար։

«Գլխավորը ոչ թե ներողությունն է, այլ սխալների ուղղումը։ Ցանկանում եմ, որպեսզի մեզ հնարավորություն տան ուղղելու սխալները»,-ասել է նա։