Բանկերը սիստեմատիկ ազդվում են բոլոր տիպի ճգնաժամերից։ Այս մասին այսօր կայացած ասուլիսի ժամանակ հայտարարել է ՀՀ ԿԲ նախագահ Մարտին Գալստյանը՝ պատասխանելով այն հարցին, թե արդյոք չի կարող լինել  վարկային պարտավորությունների մասով անհատական մոտեցում։

ԿԲ նախագահը նշել է, որ կան անհատական մոտեցումներ, հենց դրանց շրջանակներում էլ արվել է վարկային արձակուրդը, որից օգտվել են մեր քաղաքացիների 1/3-ը․ «Բայց դուք ո՞նց եք պատկերացնում՝ ԿԲ-ից զանգում են որևէ բանկին և ասում՝ Պողոս Պողոսյանի վարկը կներես, որովհետև իր մոտ եկամուտների նվազում կա»։

Ինչ վերաբերում է այն իրավիճակներին, երբ անձը բարեխիղճ մարել է վարկը, սակայն ինչ-որ պահի ունեցել է եկամտի նվազում, կարո՞ղ է անձն ակնկալել, որ բանկը հարատև ականջալուր է լինելու իր պահանջներին ու անընդհատ ասելու է՝ դե լավ, մի վճարի, Գալստյանն ասել է, որ այդտեղ մենք խնդիր ունենք․ «Որովհետև եթե բանկը նման հայեցողական մոտեցում շարունակելու է դրսևորել, մենք հետո խնդիր ենք ունենալու ավանդատուներին ավանդները վերադարձնելու հետ կապված, որովհետև հակադարձ հայցն այն կողմից լինելու է՝ իսկ կարո՞ղ ենք ավանդները չվերադարձնել, որովհետև մենք էլ ենք դժվարության մեջ, մենք էլ ենք տնտեսվարող սուբյեկտ, բարեգործական հիմնադրամ չենք, մեր սեփականատերերի կապիտալով և ներգրավված միջոցներով գործունեություն ենք իրականացնում, սեփականատերերն էլ ակնկալում են շահույթի խելամիտ մակարդակ»։

ԿԲ նախագահն ընդգծել է, որ այդպիսի միֆ էլ կա, երբ ասում են, թե բանկերը չաղ, հարուստ, անընդհատ փող աշխատող սուբյեկտներ են․ «Բայց այդտեղ շատ հետաքրքիր ֆենոմեն կա, եթե տնտեսությունում տեղի ունեցող ճգնաժամերն ազդում են տնտեսության տարբեր ճյուղերի վրա, ապա բանկերը սիստեմատիկ ազդվում են բոլոր տիպի ճգնաժամերից, ու բանկերի շահութաբերությունը Հայաստանում չափազանց ցածր է։

Գալստյանի խոսքերով, մենք որպես հասարակություն այդտեղ անելիք ունենք, եթե կարծում ենք, որ մեր որոշ համաքաղաքացիներ ունեն ֆինանսական դժվարություններ․ «Հասկանում եմ, որ ամեն դեպքի հետևում կանգնած են դժվար իրավիճակներ, ընդունում եմ, բայց դա հասարակության կոնսենսուսի հարց է, բուֆերներ ստեղծենք, ֆոնդեր ստեղծենք, բայց չենք կարող, վտանգելով արյունատար անոթներն, ակնկալել, որ մարդու մարմինը բնականոն գործունեություն է իրականացնելու»։