Երևանի ավագանու նիստին ներկայացած 41 անդամներից 31-ը՝ կողմ, 6-ը՝ դեմ, 2-ը ձեռնպահ քվեարկեցին Երևանի փողոցներում, հրապարակներում, զբոսայգիներում և այլ տարածքներում շրջածախ առևտրի իրականացումը կանոնակարգելու մասին օրենքի նախագծին:

Նախատեսվում է, որ Երևանի վարչական տարածքում գտնվող, պետության կամ համայնքային սեփականություն հանդիսացող ընդհանուր օգտագործմամբ տարածքներում շրջածախ առևտուր իրականացնելու թույլտվությունը տրամադրում է Երևանի քաղաքապետը կամ, նրա որոշմամբ՝ վարչական շրջանի ղեկավարը: Առևտրի և սպասարկման վարչության պետ Հովիկ Սաֆարյանի փոխանցմամբ՝ վաճառքի փաստը հաստատող փաստաթուղթ պետք է տրվի շրջածախ առևտրով զբաղվողներին:

«Նախագծով միայն վաճառքի փաստը հաստատող փաստաթուղթն է պարտադիր: Փակագծերում է նշված, որ պետք է ունենան ՀԴՄ, հաշվիչ և այլն: Այսինքն՝ ՀԴՄ-ն մենք չենք կարող դիտարկել որպես պարտադիր պայման և ՀԴՄ-ի ձեռբերմամբ ծանրաբեռնենք տնտեսվարողին»,- ասաց Սաֆարյանը:

Ըստ նախագծի՝ շրջածախ առևտուր պետք է իրականացվի բացառապես ձեռքից՝ վաճառվող ապրանքները չդնելով գետնին: Վաճառքի կամ ցուցադրության համար չեն կարող օգտագործվել գետնին դրվող տակդիրներ, այլ իրեր ու առարկաներ: Արգելվում է օգտագործել սայլակներ կամ շարժական այլ միջոցներ:

Ըստ վարչության պետի՝ որոշման նախագիծն ընդունելուց բյուջեի էական ավելացում չի սպասվում։

Հիշեցնենք՝ «Լույս» խմբակցության անդամներ Թեհմինա Վարդանյանը և Դավիթ Խաժակյանը հայտնել էին, որ այս նախագծով թիրախավորվում է հասարակության ամենախոցելի, սոցիալապես անապահով խավը՝ փուչիկ և գրիչ վաճառող մարդիկ: