Արցախի հեղափոխական կուսակցության նախագահ Արթուր Օսիպյանը ֆեյսբուքյան ուղիղ եթերի ընթացքում խոսեց  «Իմ իրավունքը» շարժման հիմանդրամի մասին, որի նպատակներից մեկն է պարզել, թե ինչ ճանապարհներով են մսխվում Արցախի պետական միջոցները․«Միառժամանակ առաջ նամակ էինք գրել կառավարությանը, որպեսզի մեզ տրամադրեն տեղեկություններ պետության կողմից բյուջետային երաշխավորագիր ստացած վարկերի ու ծրագրերի վերավերյալ։ Կա այդպիսի օրենք, երբ պետությունը ինչ որ անձի երաշխավորում է, որպեսզի այդ անձը կարողանա բանկից վարկ վերցնել։ Ու եթե այդ անձը չի կարողանում վարկը փակել, ապա դա արվում է պետության բյուջեից։ Ռիսկը պետությունը վերցնում է իր վրա, որպեսզի բանկը այս կամ այն մարդուն վարկ տրամադրի։ Մենք ստացել ենք պատասխան, որ կա նման 49 երաշխավորագիր, որի գումարը կազմել է 92 միլիարդ (192 մլն դոլար)։ Դա մոտ է մեր պետական բյուջեին։  Երբ որ մենք ավելի կոնկրետ հարցեր էինք տալիս, թե ի՞նչ ընկերությունների են տվել, ի՞նչ ծրագրով հիմնականում մեզ պատասխանում էին, որ դա գաղտնիք է»,-ասել է Օսիպյանը,-այս մասին գրում է Politik.am-ը

Արթուր Օսիպյանը հայտարարում է , որ այդ վարկերը հիմնականում ստանում են իշխանության մեջ գտնվող մարդիկ կամ նրանց մերձավորները։ Արցախի մեր աղբյուրները հաստատում են այս տեղեկությունները։ Ավելին, ըստ մեր տեղեկությունների երաշխավորագիր ստացած ծրագրերից մի քանիսը Արցախի նախագահ Արայիկ Հարությունյանին պատկանող ընկերություններն են ստացել։ Հիշեցնենք, որ Հարությունյանը Արցախի ամենախոշոր գործարարն է և տնտեսության հիմնական եկամտաբեր ուղղությունները իր ձեռքի տակ են։ 

Փորձեցիքն կապ հաստատել Արցախի նախագահի մամուլի խոսնակի հետ, որպեսզի պարզենք, թե նշված վարկային երաշխավորագրերից քանիսն են ստացել Հարությունյանին պատկանող ընկերությունները, սակայն խոսնակի հետ կապ հաստատել չհաջողվեց։

Եթե հաստատվեն այս տեղեկությունները, ապա կստացվի, որ  Արցախի նախագահը ոչ միայն այս տարիների իր պաշտոնական դիրքը օգտագործելով տարբեր բիզնեսներ է հիմնել և հիմնականում ոչ մրցակցային պայմաններ ստեղծելով դրանք առաջ տարել, այլև իր վարկային ռիսկերը դնում է պետության վրա, որպեսզի խնդիրների դեպքում պետությունը այդ վարկերը վճարի։ 

«Իմ իրավունքը» շարժման ներկայացուցիչ Արթուր Օսիպյանի նախաձեռնությունը իրապես գնահատելի է։ Արցախի իշխանությունները ի վերջո պետք է հրապարակային բացատրություններ ներակայացնեն, թե ում բիզնեսների ծաղկմանն է  գնում տարեկան ավելի քան 192 մլն դոլարը։