Պաշտպանության և անվտանգության հարցերի մշտական հանձնաժողովում քննարկում են տեխզննման գործընթացքում փոփոխություններ կատարելու նախագիծը:

Հարցի հարակից զեկուցող իմքայլական Արմեն Խաչատրյանը նշեց, որ ՀՀ օրենքով տեխզննում անցնելը պարտադիր բնույթ է կրում. «Մինչ 2007 թվականը գործընթացի վերահսկողությունը պետությունն էր իրականացնում, 2011 թվականից ոլորտը հանձնվեց մասնավորին: Շատ կարճ ժամանակահատվածում ներդրումներ եղան, ստեղծվել է մոտ 40 կայան: Բայց 2011 թվականին կառավարության որոշումով այս գործունեությունը վերածվեց աբսուրդի»:

Խաչատրյանը նշեց, որ 2011 թվականին վարչապետ Տիգրան Սարգսյանի որոշմամբ տեխնիկական զննության կտրոնը պարտադիր դարձավ, բայց պարտադիր չդարձավ տեխնիկական զննություն անցնելը. «Կարևորն այն է, որ քաղաքացին վճարեր բանկին, բանկից ստանար կտրոնը:

Ստացվեց, որ ներդրողները սննկացան, կայանները սկսեցին փակվել: Փաստորեն հարցը ոչ թե անվտանգությունն էր, այլ վճարելը, սա աբսուրդ էր, ինչն օր առաջ պետք է վերացնել»:

Իմքայլականի խոսքերով, նաև ամոթ է 21-րդ դարում ինչ-որ թուղթ կպցնել հողմապակուն՝ ցույց տալով տեխզննում անցնելու փաստը, դրա համար կան էլեկտրոնային միջոցներ: