«Դեմոկրատական այլընտրանք» կուսակցության քաղաքական խորհրդի նախագահ Սուրեն Սուրենյանցն այսօր լրագրողների հետ հանդիպման ընթացքում նշեց` կորոնավիրուսի համաճարակից հետո բոլոր երկրներում էլ գոտիների ձգում է տեղի ունենում. Ֆրանսիայում, Մեծ Բրիտանիայում, Բրազիլիայում կրճատել են բարձրաստիճան պաշտոնյաների աշպատավարձերը, ուշադրություն դարձրե'ք, պարգևավճարները չէ, աշխատավարձերը: Ուկրաինայում էլ Զելենսկին ամիսներ առաջ որոշում է ստորագրել` բարձրաստիճան պաշտոնյաների աշխատավարձը 20 տոկոսով կրճատելու մասին:

«Ես չեմ լսել, որ Զելենսկին հասարակ քաղաքացիներին կոչ անի մի կիլոգրամ խոզի սալ քիչ գնել կամ էլ մի քանի տուփ ծխախոտ քիչ ծխել. նման կոչեր անելը վկայում է այն մասին, որ տվյալ մարդը տնտեսության վերաբերյալ նվազագույն գիտելիքներ էլ չունի: Առևտրի շրջանառությամբ է բյուջեն լցվում, ոչ թե պետք է հասարակությանը կոչ անել այդ կամ այն ապրանքը չգնել. սա նշանակում է` երկրի ղեկավարությունն առաջին դեմքի մակարդակով չի գիտակցում պանդեմիայի լրջությունը, ավելին` այժմ մեր երկրում վարվում է հակասոցիալական քաղաքականություն»,- նշեց բանախոսը:

Սուրեն Սուրենյանցի խոսքով` Հայաստանում գավառամտության հասնող իշխանություն ունենք:

Սուրենյանցը շեշտեց` Փաշինյանը պետք է հրապարակավ ընդդիմադիր ուժերին առաջարկի գնալ սահմանադրական փոփոխությունների և գոնե հաջորդ տարում արտահերթ խորհրդարանական ընտրություն անցկացնել, քանի որ Հայաստանում կարող է տեղի ունենալ այն, ինչ Ուկրաինայում, քանի որ Հայաստանում ևս քաղաքական ճգնաժամ է հասունանում, ավելին` միգուցե, Հայաստանում իրավիճակն է'լ ավելի սարսափելի լինի, քան Ուկրաինայում էր:

MegaNews.am-ի հարցին` իսկ եթե Փաշինյանը չառաջարկի արտահերթ խորհրդարանական ընտրության գնալ, հնարավո՞ր է, որ որոշ քաղաքական ուժեր միավորվեն ու հասնեն իշխանափոխության, բանախոսը պատասխանեց. «Այո, իհարկե, դա հավանական եմ համարում: Ես պարտավոր եմ որպես քաղաքագետ` ռիսկերի մասին զգուշացնել: Քաղաքական ու սովւալական ճգնաժամն ամխուսափելիորեն զարգանում է: 5-6 ամիս հետո Փաշինյանը երազելու է, որ ընդդիմությունն իրեն արտահերթ ընտրության կոմպրոմիս առաջարկի:

Այս ինչ կոչեր են հնչեցնում.. Դուք մի շիշ արաղ քիչ խմեք, թող Արսեն Թորոսյանը պարգևավճար ստանա ու մի քանի անգամ Արագած լեռը բարձրանա: Դուք երկու ծխախոտ քիչ ծխեք, թո'ղ Արայիկ Հարությունյանը 1.5 մլն դրամ աշխատավարձ ստանա. նման կոչեր հնչեցնելն ուղղակի ադեկվատ չէ»:

Հասմիկ Սարգսյան