Իսրայելի վարչապետ Բենիամին Նեթանյահուն ներողություն է խնդրել երկրի ոստիկանության կողմից բեդուին Յակուբ Աբու ալ Քիյանի սպանության համար:Սպանությունը տեղի է ունեցել 3 տարի առաջ:

Նեթանյահուն սպանվածի ընտանիքի անդամներից ներողություն է խնդրել այն բանից հետո, երբ իսրայելական 12 News հեռուստաալիքը հրապարակել է իրավապահ մարմինների բարձրաստիճան պաշտոնյաների նամակագրությունը, որն իբր բացահայտում է կրակոցների ժամանակ ոստիկանների թույլ տված սխալները: 

«Նրանք ասացին, որ նա ահաբեկիչ է: Մենք երեկ ենք իմացել, որ ահաբեկիչ չէր»,-ասել է Նեթանյահուն` նշելով, որ իրավապահ մարմինների բարձրաստիճան պաշտոնյաները սպանվածին որպես ահաբեկիչ են ներկայացրել, որպեսզի «վնասեն» իրեն:

Մինչդեռ 2017 թվականին Նեթանյահուն ինքն էր տեղի ունեցածը «ահաբեկչության փորձ» որակել:

2017 թվականի հունվարի 18-ին իսրայելցի ոստիկանները բեդուինական ապօրինի բնակավայրի մոտ կրակել էին դպրոցի տնօրենի օգնական Աբու ալ Քիյանի մեքենայի վրա, ինչից հետո վարորդը արագացրել էր մեքենայի ընթացքը և հարվածել ոստիկաններից մեկին, որը տեղում մահացել էր: Դեպքը բնորոշվել էր որպես հարձակում մեքենայով, իսկ ոստիկանությունը, մինչև Նեթանյահուի այսօրվա հայտարարությունը, չէր հրաժարվում ալ Քիյանին ահաբեկիչ որակելուց: