Սեպտեմբերի 8-ին ֆուտբոլի Հայաստանի հավաքականը Ազգերի լիգայի C դիվիզիոնի երկրորդ խմբի շրջանակներում 2-0 հաշվով պարտության մատնեց Էստոնիայի հավաքականին: Այդ, ինչպես և Հյուսիսային Մակեդոնիայի հավաքականի հետ նախորդ հանդիպումը (1-2) բաց թողեց Հայաստանի հավաքականի ավագ, թիմի երկարամյա առաջատար ու պատմության լավագույն ռմբարկու Հենրիխ Մխիթարյանը, ով գլխավոր մարզիչ Խոակին Կապարոսի հետ զրույցում նշել էր, որ նոր է սկսել մարզվել իր թիմի՝ «Ռոմայի» կազմում ու լավ մարզավիճակում չէ:

Նշենք, որ Էստոնիայի հավաքականի նկատմամբ տարած հաղթանակը առաջինն էր վերջին 13 տարվա մեջ, երբ Հայաստանի հավաքականը խաղում էր առանց Մխիթարյանի: Մխիթարյանն իր նորամուտը Հայաստանի հավաքականում նշել է 2007թ.-ի հունվարի 15-ին՝ Պանամայի հետ ընկերական խաղում, երբ Հայաստանի հավաքականը գլխավորում էր շոտլանդացի Յան Պորտերֆիլդը:

Իսկ վերջին անգամ  Հայաստանի հավաքականը առանց Մխիթարյանի, հաղթանակ էր տարել 2007թ.-ի սեպտեմբերի 12-ին, Պորտերֆիլդի մահվան հաջորդ օրը՝ ընկերական խաղում պարտության մատնելով Մալթայի հավաքականին: Ինչ վերաբերում է պաշտոնական խաղերին, ապա վերջին հաղթանակը պաշտոնական խաղում առանց Մխիթարյանի Հայաստանի հավաքականը տարել էր նույն թվականի հունիսի 6-ին՝ սեփական հարկի տակ հաղթելով Լեհաստանի ընտրանուն: Ընդ որում, այդ ժամանակ Մխիթարյանը դեռ 18 տարեկան էր և չէր համարվում Հայաստանի հավաքականի հիմնական կազմի խաղացող:

Կարելի է ասել, որ Մխիթարյանը ամրապնդվեց Հայաստանի հավաքականի հիմնական կազմում 2009թ.-ի մարտի 28-ին: Այդ օրը Հայաստանի հավաքականը աշխարհի առաջնության ընտրական փուլի շրջանակներում սեփական հարկի տակ 2-2 հաշվով ոչ-ոքի խաղաց Էստոնիայի հետ, իսկ ինքը՝ Մխիթարյանը, իր առաջին գոլը խփեց Հայաստանի հավաքականի կազմում: Այդ օրվանից սկսած մինչ օրս Հայաստանի հավաքականը տարել էր 30 հաղթանակ, որոնց բոլորում իր մասնակցությունն էր ունեցել Մխիթարյանը: Ընդ որում, այդ 11 տարիների ընթացքում Հենրիխը բաց էր թողել Հայաստանի հավաքականի միայն 15 հանդիպում, որոնցում Հայաստանի հավաքականը 13 պարտություն է կրել և միայն երկուսը ավարտել ոչ-ոքի (2016թ.-ին՝ Սերբիայի և 2019թ.-ին՝ Լիխտեյշտեյնի հավաքականների հետ):

armtimes.com