Երեկ երեկոյան հայտնի դարձավ, որ ԱԺ իշխանական պատգամավոր, մարզիկ Արսեն Ջուլֆալակյանը որոշում է կայացրել վայր դնել մանդատը։ Պատճառը ԿԳՄՍ նախարար Արայիկ Հարությունյանի հետ ունեցած սկզբունքային անհամաձայնությունն է, ըստ այսպես ասած՝ պաշտոնական վարկածի։ Սակայն մամուլում հրապարակումներ հայտնվեցին, որոնց համաձայն, Ջուլֆալակյանի մանդատը վայր դնելու իրական պատճառը վարչապետ Փաշինյանի հետ ունեցած խնդիրներն են, որոնց համատեքստում նաեւ՝ Ջուլֆալակյանի չբավարարված ամբիցիաները։ Ասում են, որ իշխանական կուլիսներում նույնիսկ զարմացել են Ջուլֆալակյանի այս քայլից եւ համարել այն թիկունքից հարված հատկապես հիմա, երբ Արայիկ Հարությունյանի շուրջ բավական անհարմար իրավիճակ է ստեղծվել։ Ինչ որ իմաստով սա կարելի է համարել Արայիկ Հարությունյան-Արսեն Ջուլֆալակյան առճակատման մեջ Արայիկ Հարությունյանի հաղթանակը, սակայն սա միայն թերեւս Արայիկ Հարությունյանի կարծիքով կարող է այդպես լինել։ Իսկ իրականում բավական հետաքրքիր իրականություն է բացահայտվում այս քայլով։ Նախ, ուղղակիորեն հերթական անգամ ապացուցվում է, որ իշխանական թիմում կա ներքին գզվռտոց եւ մեղմ ասած մեկը մյուսին երբեմն աչքով աչք չունի տեսնելու համար։ Երկրորդ, դատելով այն հանգամանքից, որ Արայիկ-Արսեն առճակատման մեջ Նիկոլ Փաշինյանը պաշտպանել է Արայիկին, կարելի է եզրակացնել, որ իշխանության վերնախավը դարձել է քայլիստների փակ ակումբ եւ ընդհանուր պաթոլոգիկ, եթե ոչ արդեն՝ պարանոյիկ անվստահության մթնոլորտը բերել է նրան, որ իր հետ նախապես քայլածներից զատ Փաշինյանը ոչ մեկին չի տեսնում եւ վախենում է լուրջ ասպարեզներ վստահել։ Երրորդ․ Արսեն Ջուլֆալակյանը իմքայլական պատգամավորական ամբողջ 88 հոգանոց խմբից այն քիչ պատգամավորներից է, որոնց աստղը շողացել է դեռ Նիկոլ Փաշինյանի արեւի երկնակամար դուրս գալուց առաջ։ Այսինքն՝ նա քիչ բանով է կախված Փաշինյանից, որպես քիչ թե շատ վաստակ ունեցող եւ կայացած մարզիկ։ Ավելին, դառնալով իշխանական պատգամավոր, նա որոշակիորեն մսխել է իր հարգանքն ու հեղինակությունը հանուն Նիկոլ Փաշինյանի։ Հենց այս կայացածությունն է պատճառը նաեւ, որ Փաշինյանը առանձնապես ջերմ չի եղել նրա հանդեպ։ Պարզ ասած՝ Փաշինյանը չի հանդուրժում իր թիմում նրանց, ովքեր կայացած են եւ հետեւաբար քիչ կախված իրենից, իր պարգեւավճարներից, ընդհանուր առմամբ կերակրատաշտից, կամ էլ մաքուր են քիչ թե շատ կոմպրոմատներից, եւ հանդուրժում է նրանց, որոնց ինքն է օրինակ շիծ բռնողից կամ «նայթ քլաբի» աշխատակցից բերել դարձրել պատգամավոր։ Սա արդեն իշխանության կադրային քաղաքականության տրամաբանությունն ու փիլիսոփայությունն է բացահայտում եւ այս ամենի հանրագումարում՝ Արսեն Ջուլֆալակյանը բավական հզոր ազդակ հղեց՝ ենթադրաբար իշխանության պղտոր ջրերում թաթախվել պատրաստվող Արթուր Ալեքսանյանին՝ մինչ թաթախվելը եւս մեկ անգամ էլ մտածել։

politik.am