Սեպտեմբերի 5-ին 168.am-ը մի հրապարակում կատարեց, որն ավելի վաղ՝ ապրիլի 2-ին լուսաբանած թեմայի օրգանական շարունակությունն էր, այն է՝ պարզ տրամաբանական հետևողականություն:

Դեռևս ապրիլի սկզբին ահազանգել էինք, որ Երևանի աղբահանությունն իրականացնող լիբանանյան «Սանիթեք» ընկերության գործունեության անփառունակ կասեցումից հետո մայրաքաղաքի աղբահանությունն իրականացնող Երևանի քաղաքապետ Հայկ Մարությանի նախաձեռնությամբ ստեղծված «Երևանի աղբահանություն և սանմաքրում» համայնքային հիմնարկն ըստ էության հարկեր չի վճարում, և դա՝ այն դեպքում, երբ նոր իշխանությունները «Սանիթեք» ընկերությանն էին մեղադրում հարկեր չվճարելու ու նախկին իշխանությունների հետ հանցավոր համագործակցության գալու համար:

«168.am-ի ձեռքի տակ էր հայտնվել մի փաստաթուղթ, որը ՀՀ պետական եկամուտների կոմիտեն ուղարկել է Երևան քաղաքի Արգիշտի փողոց 1 հասցեում տեղակայված «Երևանի աղբահանության և սանիտարական մաքրման» պետական կառավարչական հիմնարկին: Արգիշտի փողոց 1-ը Երևանի քաղաքապետարանի հասցեն է: Փաստաթուղթը ծանուցագիր էր, որով ՊԵԿ-ը Քաղաքապետարանին տեղեկացնում է, որ վերջինս ունի չկատարած հարկային՝ ընդհանուր 4096003 դրամ գումարի պարտավորություններ, որից 4083752 դրամը՝ ապառք, իսկ 12251 դրամը՝ տույժ»,- մասնավորապես նշել էինք մեր հրապարակման մեջ՝ տեղեկացնելով, որ դա եղել է մարտի 24-ի դրությամբ:

Հիմա, բնականաբար, վճարվելիք գումարն անգամներով ավելացած կլինի:

Խոստացել էինք հետևել իրադարձությունների ընթացքին, հատկապես որ, մեր տեղեկություններով՝ ավելի վաղ ՊԵԿ-ը Քաղաքապետարանից պահանջել էր նաև ԱԱՀ հաշվարկի վերաբերյալ տվյալներ, որի վճարումից համայնքային հիմնարկն ազատված է, սակայն պարտավոր է ՊԵԿ-ին ամեն դեպքում հաշվարկ ներկայացնել, ինչը քաղաքապետարանը չի կատարել:

«Բանն այն է, որ բազմաթիվ համայնքապատկան ՓԲԸ-ների և ՀՈԱԿ-ների շարքում քաղաքապետ Հայկ Մարությանի աշխատակազմն աղբահանության նոր հիմնարկի համար որոշել էր ընտրել «համայնքային հիմնարկ» իրավակազմակերպական ձևը՝ ենթադրելով, որ այդ կերպ հնարավոր կլինի խուսափել ԱԱՀ հաշվարկումից և վճարումից, քանի որ, ըստ Հարկային օրենսգրքի 64-րդ հոդվածի 2-րդ մասի 18-րդ կետի՝ ԱԱՀ-ից ազատվում է պետական կառավարման մարմինների կողմից այն ծառայությունների մատուցումը, որոնց համար օրենքով սահմանված է պետական տուրքի վճարում։ Սակայն լիազոր մարմին Պետական եկամուտների կոմիտեն, ուսումնասիրելով օրենսգրքի այդ դրույթը, գտել է, որ «Երևանի աղբահանություն և սանիտարական մաքրում» համայնքային հիմնարկը չի կարող օգտվել այդ արտոնությունից, քանի որ այն թեպետ անունով «համայնքային հիմնարկ» է, սակայն էությամբ պետական կառավարման մարմին չէ։ Երևանի քաղաքապետարանում կա մեկ կառավարման մարմին՝ հիմնարկ, և դա հենց Երևանի քաղաքապետարանի աշխատակազմն է, և ողջամիտ չէ աղբահանության գործառույթներ կատարող կառույցին համարել պետական կառավարման մարմին։ Այս ընթացքում, մեր տեղեկություններով, խնդիրը քննարկվել է քաղաքապետարանի և Պետեկամուտների կոմիտեի միջև, որն ամփոփվել է ՊԵԿ-ի կողմից օգոստոս ամսին ուղարկված ծանուցմամբ»,- նշել էինք մեր հրապարակման մեջ:

Այսինքն՝ ՊԵԿ-ը կրկին գրություն էր ուղարկել քաղաքապետարան՝ պահանջելով, այնուամենայնիվ, վճարել հարկերը: Այսքանը՝ նյութի մասին:

Այսօր 168.am-ը թեմայի վերաբերյալ պարզաբանում ստացավ քաղաքապետարանից, որում նշված է․

«Հրապարակված մի շարք տեղեկություններ չեն համապատասխանում իրականությանը: Մասնավորապես, իրականությանը չի համապատասխանում այն տեղեկությունը, որ «Երևանի աղբահանություն և սանմաքրում» համայնքային հիմնարկը խուսափել է կատարել հարկային պարտավորությունները, և «2020թ. մարտ ամսվա դրությամբ կուտակված են եղել արդեն ՝ ընդհանուր 4096003 դրամ գումարի պարտավորություններ, որից 4083752 դրամը՝ ապառք, իսկ 12251 դրամը՝ տույժ»: Հայտնում ենք, որ «Երևանի աղբահանություն և սանիտարական մաքրում» համայնքային հիմնարկը 2020թ. մարտ ամսվա դրությամբ չկատարած հարկային պարտավորություններ չի ունեցել: Հիմնարկը հարկային չմարած պարտավորություններ չի ունեցել նաև մարտ ամսվանից հետո: Այսինքն, պնդումը, որ «հիմա վճարվելիք գումարն անգամներով ավելացած կլինի», նույնպես իրականության հետ չի առնչվում»:

Քաղաքապետարանի ֆինանսական բլոկի պատասխանատու պաշտոնյաներին ևս մեկ անգամ հորդորում ենք լավ կարդալ ապրիլի 2-ին հրապարակված նյութը, ուր մենք տեղադրել էինք նաև ՊԵԿ-ի այն գրությունը, որով պահանջել են հարկերը վճարել, և որտեղ նշված էր օրվա դրությամբ հարկային պարտավորությունների հանրագումարը:

Այսինքն՝ այդ թվերը վկայող փաստաթուղթը հրապարակված է:

«Հոդվածում խոսվում է հիմնարկի կողմից ԱԱՀ վճարելու պարտավորության խնդրի մասին: Սույնի վերաբերյալ տեղեկացնում ենք, որ Երևանի քաղաքապետարանը ՀՀ պետական համապատասխան գերատեսչությունների հետ քննարկում է ԵԱՍՄ հիմնարկի՝ ԱԱՀ վճարելու պարտավորության հարցը: Եթե քննարկումների արդյունքում պարզվի, որ համայնքային հիմնարկը ԱԱՀ վճարելու պարտավորություն ունի, ապա, բնականաբար, կկատարի այդ պարտավորությունը: Ուստի, անտեղի են նաև հոդվածում հիատակվող՝ քրեական օրենսդրության հետ առնչությունները տվյալ պարագայում»,- ասված է քաղաքապետարանից ուղարկված պարզաբանման մեջ:

Իհարկել, լավ է, որ քննարկում են. Մենք ընդամենը հիշեցրել ենք, որ ՊԵԿ-ը քաղաքապետարանից պահանջում է հարկ վճարել, իսկ քաղաքապետարանը չի վճարում: Չգիտենք, իհարկե, քննարկումներն ինչ փուլում են, բայց փաստացի ՊԵԿ-ն արդեն 2-րդ գրությունն է ուղարկում հարկեր վճարելու պահանջի վերաբերյալ:

 

Ու մի բան էլ: Այդ քննարկումների արդյունքում արդեն 9 ամիս հարկ չի վճարվում պետական բյուջե: Ի՞նչ է սա, եթե ոչ՝ հանցակազմ:

Պարզաբանման վերջում նշել էին, որ «Աղբահանության և սանիտարական մաքրման» մասին ՀՀ օրենքի 8-րդ հոդվածի 1-ի կետի համաձայն, համայնքի ավագանու որոշմամբ աղբահանության և սանիտարական մաքրման աշխատանքները համայնքի բյուջեի միջոցների հաշվին իրականացնում են անմիջականորեն համայնքային հիմնարկները կամ համայնքի կարիքների համար գնումների մասին օրենսդրությամբ սահմանված կարգով ընտրված օպերատորը: ԵԱՍՄ-ը մեջբերված կետում հիշատակված համայնքային հիմնարկ է: Իսկ ՀՀ Հարկային օրենսգրքի 59 հոդվածի 4-րդ մասի 2-րդ կետի համաձայն, համայնքային հիմնարկը հարկային մարմնում որպես պարտադիր ԱԱՀ վճարող կազմակերպություն չէ:

Բնավ չենք ուզում մտնել գերատեսչությունների «քննարկումների» մատի ու մատանու արանքը, բայց ցանկալի է, որ ամեն դեպքում մի քիչ արագ կողմնորոշվեն, որպեսզի հասկանալի լինի՝ ի վերջո, Երևանի քաղաքապետարանը զինվորից հաց գողացո՞ղ է, թե՞ ոչ: