Նավալնիի օրգանիզմում «Նովիչոկի» խմբի թույնի առկայությունը հաստատել են Ֆրանսիայի և Շվեդիայի լաբորատորիաները
Ֆրանսիայում և Շվեդիայում գտնվող լաբորատորիաներում կատարված հետազոտությունները հաստատել են ռուս քաղաքական գործիչ Ալեքսեյ Նավալնիի օրգանիզմում «Նովիչոկի» խմբի թույնի առկայությունը։ Այս մասին հաղորդում է Meduza պարբերականը։
Բեռլինում պարզաբանել են, որ Նավալնիից վերցված նմուշներն ուղարկվել են նշված երկու երկրներ անկախ հետազոտություն անցկացնելու համար։ Բացի դրանից՝ նմուշներն ուղարկվել են նաև Քիմիական զենքի արգելման կազմակերպություն, որը կանցկացնի իր սեփական հետազոտությունը։
Նավալնիի օրգանիզմում «Նովիչոկի» հետքեր էին հայտնաբերել Գերմանիայի Բունդեսվերի լաբորատորիայում։ ՌԴ իշխանությունները պնդում են, որ Օմսկում կատարված հետազոտությունները քաղաքական գործչի օրգանիզմում թունավոր նյութեր չեն հայտնաբերել։
Հիշեցնենք՝ Ալեքսեյ Նավալնիի ինքնազգացողությունը կտրուկ վատացել էր օգոստոսի 20-ին՝ Տոմսկից Մոսկվա ուղևորվող ինքնաթիռում։ Օդանավն արտակարգ վայրէջք էր կատարել Օմսկում, որտեղ Նավալնին սկսել էր բուժում ստանալ։ Օրեր անց քաղաքական գործչին տեղափոխել էին Բեռլին։