Ընդհանուր իրավասության դատարանի Շենգավիթի նստավայրում ՊՎԾ լիազորությունները կասեցված պետ Դավիթ Սանասարյանի գործով դատական նիստը մեկ ամիս ընդմիջումից հետո 15 րոպե տևեց։ Այսօր պետք է վկաներ հարցաքննվեին, սակայն նրանց մի մասի ծանուցումները վերադարձվել էին դատարան, մյուս մասն էլ, ովքեր աշխատում են «Սուրբ Գրիգոր Լուսավորիչ» ԲԿ-ում, տեղեկացրել էր, որ կարևորելով դատավարության մասնակիցների առողջությունը՝ չի ներկայանա նիստին։

Վկաներից բացի, դատարան չէր եկել նաև Գևորգ Խաչատրյանի պաշտպանը։ Նա արձակուրդում է։ Պետական մեղադրող Գևորգ Սարգսյանը միջնորդեց բերման ենթարկել դատարան չներկայացած վկաներին, նրան միացան բոլորը, բացի փաստաբան Արսեն Սարդարյանից: Դատարանը նշեց, որ իրավասու չէ բերման ենթարկել վկաներին, քանի որ նրանք իրենց բացակայության մասին տեղեկացրել են դատարանին, և պատճառաբանությունը դատարանը անհարգելի չի գնահատում։ Դատավոր Դավիթ Բալայանը որոշեց ևս մեկ անգամ ծանուցել վկաներին դատարան ներկայանալու համար: Դատական նիստը հետաձգվեց և նշանակվեց հոկտեմբերի 13-ին։

Հիշեցնենք՝ Դավիթ Սանասարյանին մեղադրանք է առաջադրվել ՀՀ Քրեական օրենսգրքի 308-րդ հոդվածի 1-ին մասով` պաշտոնեական լիազորությունները չարաշահելու համար: Նրա նկատմամբ որպես խափանման միջոց է ընտրվել չհեռանալու մասին ստորագրությունը: Բացի Սանասարյանից քրեական գործով անցնում է 4 ամբաստանյալ՝ ՊՎԾ ևս երկու աշխատակից՝ Գևորգ Խաչատրյանը, Սամվել Ադյանը և վերջինիս ընկերը՝ «Զորաշեն» ՍՊԸ-ի փաստացի ղեկավար Տարոն Ավետիսյանը։