Երեկ հանրակրթական դպրոցներում սկսվել են դասերը: Ես հասկանում եմ, որ բոլոր ժամանակներում եղել են, կան ու լինելու են Հռոմի պապից ավելի կաթոլիկ մարդիկ, ուսուցիչներ, որոնք իրենց իջեցված հանձնարարականն այնպիսի ջանադրությամբ են տրանսֆորմացնում և կատարում, որ արդյունքում մենք ունենում ենք խեղաթյուրված պատկերներ: Այս մասին ԱԺ հայտարարությունների ժամին հայտարարեց «Բարգավաճ Հայաստան» խմբակցության պատգամավոր Նաիրա Զոհրաբյանը:

Նա ցուցադրեց երեկ դպրոցներում արված լուսանկարներ, որոնցում, ըստ Զոհրաբյանի, երեխաները ռազմագերինիերի նման բարձրացրել են ձեռքերը, որ ուսուցիչը մոտենա նրանց ու չափի ջերմությունը:

«Իմաստը ո՞րն է՝ երեխաները ձեռքերը վերև բարձրացրած պահեն, կարող են իջեցրած պահել, ուսուցիչը մոտենա, դաստակից ջերմաչափի: Մյուս նկարում երեխաները պարանով են բռնված. երկար անունը կրող նախարարությունից իջեցված, շատ դեպքերում՝ անհասկանալի հանձնարարականները կատարելու համար ինչո՞ւ եք կոտորում ձեզ»,- հայտարարեց նա։

Ապա, դիմելով ծնողներին, պատգամավորը հարց բարձրացրեց, թե ինչու են թույլ տալիս՝ երեխաներին այդպես կանգնեցնեն, երբ առանց ավելորդ ջղաձգումների կարելի է մոտենալ նրանց, ասել՝ բարձրացնեն ձեռքն ու ջերմաչափել:

«Հիմա երեխայի հիշողության մեջ իր առաջին դասարանից տպավորությունը սա է մնալու. Բա ինչո՞ւ չեք խոսում, ո՞ւր մնաց մարդու իրավունքը, երեխայի իրավունքը»,-ասաց Նաիրա Զոհրաբյանը: