Եթե ՀՀ քաղաքացին հոգեմետ նյութ պարունակող դեղ է պատվիրում որևէ երկրից՝ հիվանդությունը բուժելու համար, սահմանում հայտնաբերելուց հետո հարուցվում է քրեական գործ և անձը կարող է 2-6 տարի ժամկետով ազատազրկման ենթարկվել: Այս մասին այսօր Ազգային ժողովում հայտարարությունների ժամին ասաց «Իմ քայլը» խմբակցության պատգամավոր Արմեն Խաչատրյանը:

«Այս պահի դրությամբ 170 քրեական գործ ունենք, որոնց 90 և ավելի տոկոսը կազմում են շատ ծանր հիվանդություն ունեցող անձիք, որոնց վերաբերյալ կան բժշկի ցուցումներ, կան նշանակումներ՝ այնպիսի դեղամիջոցների, որոնք ՀՀ-ում չկան և մարդիկ ստիպված են արտասահմանից ձեռք բերել այդ դեղը և ստացվում է, որ հարուցվում են քրեական գործեր»,-ասաց նա:

Արմեն Խաչատրյանը նշեց, որ սա ամենավատագույն բանն է, որ հիվանդի նկատմամբ կարելի է անել: «Այս ուղղությամբ կառավարությանը խնդրում և հորդորում եմ, որ ձեռնարկի անմիջապես միջոցառումներ: Կառավարության որոշման մեջ պետք է փոփոխություններ կատարվի, որ եթե բժշկի ցուցումով է և այդ դեղը ՀՀ-ում գրանցված չէ, ապա բժշկի թույլատրված չափով պետք է թույլատրել, որ ներկրվի»,-ասաց նա: Ըստ պատգամավորի՝ այդ հարուցված 170 քրեական գործերը պետք է դիտվի ծայրահեղ անհրաժեշտություն և այդպիսի գործերը կարճվեն: