Ինչպես հայտնել ենք  , երեկ՝ սեպտեմբերի 14-ին, «Հարցազրույց Պետրոս Ղազարյանի հետ» հաղորդման ընթացքում հաղորդման ձևաչափից դուրս՝ բանավեճ սկսվեց հաղորդումը վարողի՝ Պետրոս Ղազարյանի և հաղորդման հյուրի՝ ԱԺ «Լուսավոր Հայաստան» խմբակցության պատգամավոր միջև։

Հիշեցնենք՝ հաղորդման ընթացքում քննարկցին ԿԳՄՍ նախարարության կրթական նոր չափորոշիչները: Հարցազրույցի ընթացքում հարցազրուցավար Պետրոս Ղազարյանը և Անի Սամսոնյանն սկսեցին բանավիճել թեմայի վերաբերյալ: «Դուք տարրական գիտելիքներ չունեք այդ ոլորտի մասին»,- դիմելով Սամսոնյանին՝ ասաց Պ. Ղազարյանը:

Բանավեճի ընթացքում Սամսոնյանի հարցին՝ «կթողնե՞ք ես խոսեմ», Ղազարյանն արձագանքեց. «Չէ՛, չեմ թողնի»: Հաղորդավարը հյուրին մեղադրեց նաև սուտ տեղեկություններ տարածելու մեջ:

Անդրադառնալով այս միջադեպին՝ ԱԺ «Լուսավոր Հայաստան» խմբակցության պատգամավոր Գևորգ Գորգիսյանը MegaNews.am-ի թղթակցի հետ զրույցում նշեց․ «Պետրոս Ղազարյանը իրեն պահեց ոչ թե որպես լրագրող, այլ որպես սադրիչ, բանսարկու, և նույնիսկ վիրավորական բառեր հնչեցրեց՝ հաշվի չառնելով, որ հյուրը կին է ու ԱԺ պատգամավոր»։

Գորգիսյանի խոսքով՝ սա անհարգալից վերաբերմունք էր ոչ միայն Անի Սամսոնյանի, այլ, ընդհանրապես, ԱԺ-ի ու պատգամավորի ինստիտուտի նկատմամբ։

«Կարծում եմ՝ «Հանրային Հեռուստաընկերություն»-ը պարտավոր է այս խայտառակությունից հետո դիտարկել Պետրոս Ղազարյանի հետագա պաշտոնավարման հարցը։ Պետրոս Ղազարյանը երկար տարիների մանիպուլյացիաների ու տվյալ պահին՝ իշխանությունների ծառայելու մեծ փորձ ունի ու չի բացառվում, որ նա եթերում իր կնոջ շահերն էր պաշտպանում», — նշեց Գևորգ Գորգիսյանը։

Պատգամավորը հավելեց՝ միգուցե, իշխանությունը Պետրոս Ղազարյանին ների այս պահվածքի համար, քանի որ նրա կինը շահագրգիռ կողմ է։

Հիշեցնենք՝ Պ․ Ղազարյանի կինը՝ Ժաննա Անդրեասյանը, ԿԳՄՍՆ փոխնախարարն է և ներգրավված է կրթական չափորոշիչների աշխատանքներում:

«Բայց խոսքն արժեհամակարգի մասին է․ եթե դա գոյություն ունի, ապա Ղազարյանն այս ամենից հետո անգամ մեկ օր չպետք է աշխատի «Հանրային»-ում։ Այս հեռուստաընկերությունը նաև պետբյուջեից է սնվում, ու եթե կառավարությունը պատշաճ չարձագանքի այս ամեին, սա կլինի հերթական ցուցադրումը, թե ինչպիսին է մեր կառավարությունն ու իշխանությունը, և թե ինչպիսի արժեհամակարգ է ներդրված պետական կառավարման մեջ», — նշեց պատգամավորը։

ԱԺ «Բարգավաճ Հայաստան» խմբակցության պատգամավոր Շաքե Իսայանը ևս դատապարտելի համարեց Պետրոս Ղազարյանի դրսևորած պահվածքն ու հաղորդավարական էթիկան։

«Եկե՛ք մի թողմ թողնենք այն փաստը՝ հյուրը պատգամավոր էր, մանկավարժ, գիտնական, թե մեկ այլ ոլորտի ներկայացուցիչ․․․ Առհասարակ, կարծում եմ՝ հաղորդման ընթացքում պետք է պահվեր հաղորդավարի էթիկան։ Հաղորդումը նայելիս ես արձանագրեցի, որ թույլ չէր տրվում, որ տիկին Սամսոնյանն իր խոսքը վերջացնի։ Տպավորությունն այնպիսին է, որ հարց էր տրվում, բայց Պ․ Ղազարյանին կարծես պատասխանը չէր հետաքրքրում, և նա խնդիր էր դրել իր դիրքորոշումը ներկայացնել տվյալ հարցի վերաբերյալ։ Ես դա հարցազրույց չէի համարի։ Կարծես թե, հաղորդավարն ուրիշ խնդիր ուներ լուծելու, և, միգուցե, իր կարծիքով՝ դա հաղոջվեց իրեն», — նշեց Շաքե Իսայանը։

Պատգամավորը շեշտեց՝ եթե հաղորդավարը հյուր է հրավիրել, նա պետք է պատրաստ լինի լսել տվյալ հյուրի կարծիքը, որքան էլ դա իր համար անընդունելի լինի կամ շահերի բախում լինի, և ըստ այդմ՝ հյուրի մեկնաբանությունները ցավոտ լինեն հաղորդավարի համար։ Շաքե Իսայանի խոսքով՝ հաղորդավարը պարտավոր է անկախ վերը նշված հնարավոր դեպքերից՝ հանդուրժողականորեն լսել հաղորդման հյուրի կարծիքները, որպեսզի նմանատիպ տհաճ միջադեպեր չլինեն։

«Ցանկացած հաղորդման ընթացքում, երբ հաղորդավարը չի պահպանում էթիկայի տարրական կանոնները, հեռուստաընկերությունը, այս պարագայում՝ «Հանրային հեռուստաընկերությունը» մտածելու լուրջ խնդիր ունի, քանի որ այդ հեռուստաընկերությունը՝ որպես պետբյուջեից ֆինանսավորում ստացող լրատվամիջոց, իր օբյեկտիվ ու անաչառ լրատվությամբ, պրոֆեսիոնալիզմով պետք է օրինակ ծառայի մյուս հեռուստաընկերույթուններին, ինչը, ցավոք, այդպես չէ։ Կարծում եմ՝ Պետրոս Ղազարյանի պահվածքի համար պետք է ներողություն խնդրի նաև «Հանրային հեռուստաընկերությունը»», — նշեց պատգամավորը։

Հավելենք՝ այսօր ԱԺ ամբիոնից հայտարարությունների ժամին Անի Սամսոնյանը հայտարարեց՝ պահանջում է, որ Պետրոս Ղազարյանը ներողություն խնդրի իրենից, վերջինս, սակայն, դեռևս դա չի արել։

Հասմիկ Սարգսյան