Ժուռնալիստների միության նախագահ Սաթիկ Սեյրանյանը վստահ է՝ երեկ «Հանրային հեռուստաընկերության» եթերում հեռարձակվող «Հարցազրույց Պետրոս Ղազարյանի հետ» հաղորդման ընթացքում Պետրոս Ղազարյանը խախտել է լրագրողական էթիկան։ Հիշեցնենք՝ հաղորդման հյուրը ԱԺ «Լուսավոր Հայաստան» խմբակցության պատգամավոր Անի Սամսոնյանն էր։ Հաղորդման ընթացքում քննարկվում էին ԿԳՄՍ նախարարության կրթական նոր չափորոշիչները:

«Լրագրողական էթիկայի խախտում կար ի սկզբանե, քանի որ ըստ իս՝ Պետրոս Ղազարյանն այդ թեմայի հետ կապված՝ պետք է կաշկանդված լիներ․ նրա կինը ԿԳՄՍ փոխնարարար է և նրա կինն է այսպես ասած՝ առաջ տանում այդ չափորոշիչների գաղափարը կամ կոնցեպցիան, այնպես որ՝ սա էթիկայի կոպտագույն խախտում է, շահերի բախում կա, և կարծում եմ՝ Պետրոս Ղազարյանն ընդհանրապես չպետք է այդ թեմայով հարցազրույցներ անցկացնի», — MegaNews.am-ի հետ զրույցում նշեց Սաթիկ Սեյրանյանը։

Վերջինս շեշտեց՝ լրագրողական էթիկայի համաձայն՝ եթե հաղորդավարը հյուրին հրավիրել է, ապա պետք է թույլ տա նրան իր տեսակետը ներկայացնել։

«Պետրոս Ղազարյանն ի՞նչ գիտի՝ Անի Սամսոնյանն այդ նյութերը կարդացել է, թե չի կարդացել, որ նման պնդում է անում հաղորդման ընթացքում», — նշեց Սաթիկ Սեյրանյանը՝ հավելելով՝ Անի Սամսոնյանը կարող էր պահանջել որ այդ հաղորդումը եթեր չհեռարձակվեր, քանի որ բոլոր չափանիշներով էթիկայի խախտում է թույլ տվել․ Պետրոս Ղազարյանը տվյալ դեպքում պաշտպանել է իր կնոջ շահերը, իր կնոջ շահերից է հանդես եկել։

«Պետրոս Ղազարյանը խախտել է և՛ մարդկային, և՛ մասնագիտական էթիկայի կանոններ, և կարծում եմ՝ ոչ միայն Անի Սամսոնյանը, այլև «Լուսավոր Հայաստան»-ը պետք է հայտարարություն տարածի և իր դիրքորոշումն արտահայտի կատարվածի վերաբերյալ», — եզրափակեց Սաթիկ Սեյրանյանը։

Հասմիկ Սարգսյան