ԱԺ-ում քննարկվեց  «Ճանապարհային երթևեկության անվտանգության ապահովման» մասին օրենքում փոփոխություններ կատարելու մասին և կից ներկայացված օրենքների նախագծերի փաթեթն առաջին ընթերցմամբ ընդունելու հարցը:  ՀՀ տարածքային կառավարման և ենթակառուցվածքների նախարարի տեղակալ  Արմեն Սիմոնյանը նշեց՝ նախատեսվում է տեխնիկական զննության գործընթացի վերահսկողությունն իրականացնել էլեկտրոնային շտեմարանի  և արատորոշման քարտի միջոցով՝ ներկայիս տեխնիկական զննության կտրոնի փոխարեն: Դա հնարավորություն կտա ճանապարհային ոստիկանությանը վերահսկողություն իրականացնել էլեկտրոնային եղանակով՝ առանց տրանսպորտային միջոցը կանգնեցնելու: Տեխզննության կտրոնը այլևս պարտադիր չի դառնում, հողմապակու վրա որևէ թուղթ չի փակցվելու:

Առաջարկվում է նաև առաջին տեխնիկական զննությունն իրականացնել թողարկման 4-րդ տարում, մինչև թողարկման 10 տարին՝ 2 տարին 1 անգամ, 10 տարեկանից բարձր՝ տարեկան 1 անգամ:

Փոխնախարարը նաև նշեց, որ վարչական պատասխանատվություն է սահմանվել օրենքի համաձայն տեխնիկական զննություն չանցած տրանսպորտային միջոց վարելու և առանց տեխնիկական զննություն անցկացնելու կամ տեխնիկական անսարքություն ունեցող տրանսպորտային միջոցը տեխնիկապես սարքին ճանաչելու համար՝ ընդհուպ լիցենզիայի դադարեցում:

 
Հարցին, եթե մեքենան չունի կատալիզատոր՝ այն համարվելո՞ւ է որպես տեխնիկական ստուգում անցած տրանսպորտային միջոց, թե՞ ոչ՝ փոխնախարարը պատասխանեց.

«Բնապահպանական խնդիրները հաշվի առնելով՝  դրանք պետք է լինեն, և համապատասխանեցվի CO-ի մակարդակի: Որևէ մեկը չի խթանել, որպեսզի դրանք մեքենաների վրայից հանվեն: Դա պետք է լինի տեխնիկական զննում անցնելիս, որպեսզի ապահովվի այն նորմը, որը սահմանված է»:

Սակայն ԱԺ պաշտպանության և անվտանգության հարցերի մշտական հանձնաժողովի անդամ Արմեն Խաչատրյանը  նկատեց, որ կատալիզատորների համար գուցե ինչ-որ ժամանակ տրվի.

 
«Այս պահին դրանով պայմանավորված շահագործման արգելք դնելը նպատահակարմար չէ»:

Ըստ նրա՝ կատալիզատոր չունեցող մեքենաների քանակը Հայաստանում շատ է, կատալիզատորն էլ թանկ է:

«Կարծում եմ՝ այս բեռը ներկայում չենք դնի քաղաքացիների վրա»:

ԱԺ ներկայացված փոփոխությամբ առաջարկվում է նաև լիցենզավորել գազաբալոնային սարքավորումների տեղադրման գործունեություն իրականացնող տնտեսվարողներին: Բացառվում է լիցքավորման կայաններում շահագործման ժամկետն ավարտված կամ վկայագրում չանցած գազաբալոնների լիցքավորումը:  Սահմանվում է նաև վարչական պատասխանատվություն՝ պահանջները խախտելու դեպքում:

Խորհրդարանի ամբիոնից նշվեց նաև, որ համապատասխան կարգ է մշակվելու, որ այն կայաններում, որտեղ վկայագրում է տեղի ունենալու, գործընթացն իրականացվի օնլյան, այսինքն՝ այն, ինչ ստուգվելու է օնլայն, շտեմարանով ամրագրվելու է: