Բելառուսում այսօր անկախ ԶԼՄ-ները հրատարակվել են առանց լուսանկարների՝ արտահայտելով իրենց համերաշխությունը նախօրեին ձերբակալված ֆոտոլրագրողներին: Այդ մասին հաղորդում է «Ազատություն» ռադիոկայանը։ Տասնյակից  ավելի թերթեր ու համացանցային կայքեր հոդվածները հրապարակում են առանց լուսանկարի և մակագրում. «Այստեղ կարող էր լինել լուսանկար, սակայն լուսանկարիչներ չկան։ Նրանց Բելառուսում ձերբակալում են»։

Նշվում է, որ ֆոտոլրագրողներ Ալեքսանդր Վասյուկովիչին և Վլադիմիր Գրիդինին նախօրեին ձերբակալել են տասնմեկ օրով՝ «չթույլատրված հավաքների մասնակցելու համար»։ Մինչդեռ, նրանք կատարում էին իրենց մասնագիտական պարտքը՝  լուսաբանում էին հերոսների քայլերթը։