Ուսման վարձավճարը մինչեւ սեպտեմբերի 18-ը չվճարելու դեպքում 500 ուսանող կարող է դուրս մնալ ԲՈՒՀ-երից: Այս մասին «Փաստինֆո»-ին ասաց ԵՊՀ ուսանողական խորհրդի նախագահ Դավիթ Ափոյանը:

Դեռևս երկու օր առաջ ԵՊՀ ուսանողները դիմել էին գործադիրին՝ ուսման վարձերի մասնակի փոխհատուցման խնդրանք-պահանջով, որը ստորագրել էր ավելի քան 5000 ուսանող: Վերջիններս նշում էին, որ համավարակի հետևանքով առաջացած ֆինանսական խնդիրներով պայմանավորված՝ չեն կարողանում վճարել ուսման վարձը, իսկ վճարման վերջնաժամկետն է սեպտեմբերի 18-ը, չվճարելու դեպքում կկանգնեն համալսարանից դուրս մնալու վտանգի առջև:

Կառավարության ներկայացուցիչն էլ խոստացել էր վարչապետի հետ առաջիկա հանդիպման ընթացքում փոխանցել նամակը նրան և քննարկել խնդիրը:

Այս առիթով «Փաստինֆո»-ն զրուցել է ԵՊՀ ՈՒԽ նախագահ Դավիթ Ափոյանի հետ, որը մեզ հետ զրույցում նշեց, որ խնդրին լուծում չտալու դեպքում շուրջ 500 ուսանող կարող է դուրս մնալ համալսարանից:

«Նամակը փոխանցել ենք վարչապետի օգնականին, նա էլ մեզ ասաց, որ առաջիկայում կմշակվի աջակցության ծրագիր: Շուտով մոտենում է վարձավճարների օրը, պետք է հնարավորինս շուտ մշակվի փոխհատուցման ծրագիրը: Գոնե մինչև երկուշաբթի բուհերին գրությամբ պետք է հանձնարարվի, որ վարձը չվճարած ուսանողներին դուրս չթողնեն համալսարանից: Մեկ շաբաթ առաջվա տվյալներով մոտ 500 ուսանող համալսարանից դուրս գալու վտանգի տակ է:Գոնե մինչև երկուշաբթի բուհերին գրությամբ պետք է հանձնարարվի, որ վարձը չվճարած ուսանողներին դուրս չթողնեն համալսարանից»:

Անդրադառնալով Արայիկ Հարությունյանի երեկվա հայտարարությանը, որ ԿԳՄՍ նախարարությունը ուսման գների բարձրացման հետ որևէ առնչություն չունի՝ Դավիթ Ափոյանը նշեց, որ թեև որոշումը կայացրել է համալսարանը, բայց նախարարությունը կարող է վերանայել և լուծում տալ խնդրին:

«Ճիշտ է որոշումը համալսարանի գիտական խորհրդում է ընդունվել, բայց ո՞նց կարող է նախարարությունը կապ չունենալ, այդ դեպքում ինչու՞ են ութ հոգով ներկայացված հոգաբարձուների խորհրդում: Չեմ հասկանում նման հայտարարության իմաստը», - ասաց Դավիթ Ափոյանը:

Զրույցի վերջում ՈՒԽ նախագահը հայտնեց, որ սպասում են կառավարության որոշմանը: «Եթե որոշման արդյունքում ուսանողները դուրս մնան համալսարանից, ապա հանդես կգան հայտարարությամբ և կմշակեն հատուկ քայլեր», -եզրափակեց Ափոյանը: